سردیوں میں گھریلو صارفین کو بلاتعطل گیس فراہمی کیلئے بڑا فیصلہ

وفاقی حکومت نے شدید سردی والے دو ماہ دسمبر اور جنوری کے دوران ملک بھر میں سی این جی اسٹیشنز بند کرنے کا فیصلہ کرلیا۔

وزارت پیٹرولیم کے حکام نے کہا ہے کہ یہ اقدام قدرتی گیس کے گھریلو صارفین کی مسلسل فراہمی کو یقینی بنانے کے لیے کیا گیا ہے۔ اس فیصلے کے تحت ان دو مہینوں میں گیس سے بجلی پیدا کرنے والی ملکی صنعت کو بھی گیس کی فراہمی بند رہے گی۔

مزید پڑھیں: یکم نومبر سے پیٹرولیم مصنوعات کی قیمتوں میں کمی کا امکان

وزارت پیٹرولیم کے مطابق اس طرح چاروں صوبوں میں جو انڈسٹری گیس سے بجلی پیدا کرکے کام کر رہی ہے یا کیپٹو پاور اسٹیشنز اپنے کارخانوں میں لگائے ہوئے ہیں ان اسٹیشنوں کے لیے دسمبر 2024 تا جنوری 2025 تک گیس کی فراہمی روک دی جائے گی اور یہ انڈسٹری بھی بجلی کمپنیوں کی بجلی استعمال کرے گی۔

سوئی ناردرن گیس کمپنی لمیٹڈ کو ہدایت کی گئی ہے کہ یکم دسمبر 2024 سے 31 جنوری 2025 تک سی این جی اسٹیشنز بند رکھنے کے احکامات جاری کیے جائیں اور ان کے گیس کنکشن منقطع کیے جائیں۔

وفاقی حکومت کی جانب سے یہ فیصلہ گھریلو صارفین کی ضروریات کو مدنظر رکھتے ہوئے کیا گیا ۔