پاکستان تحریک انصاف کے 24 نومبر کو احتجاج کے پیشِ نظر وفاقی وزارت داخلہ نے چیف سیکرٹری خیبر پختونخوا کو مراسلہ جاری کردیا۔
وفاقی وزارت داخلہ کی جانب سے جاری ہونے والے مراسلے میں واضح کیا گیا کہ احتجاج میں کسی بھی سرکاری مشینری کا استعمال نہ کیا جائے۔ مراسلے میں یہ بھی کہا گیا ہے کہ سرکاری ملازمین اور سرکاری خزانہ کو کسی بھی سیاسی جماعت کے احتجاج میں استعمال نہ کیا جائے۔
یاد رہے کہ تحریک انصاف کے گزشتہ احتجاج میں بھی سرکاری وسائل کا بے دریغ استعمال کیا گیا تھا۔
دوسری جانب وفاقی حکومت نے پاکستان تحریک انصاف کے 24 نومبر کو ہونے والے احتجاج کے پیش نظر اسلام آباد میں رینجرز اور ایف سی کو خصوصی اختیارات دیدئیے۔ وفاقی وزارت داخلہ کی جانب سے پی ٹی آئی کے احتجاج کے معاملے پر تحریری حکم نامہ جاری کردیا گیا ہے، جس کے مطابق اسلام آباد میں رینجرز اور ایف سی کو خصوصی اختیارات دے دیے گئے ہیں۔
حکم نامے میں کہا گیا کہ وزارت داخلہ نے پنجاب رینجرزاور ایف سی کو انسداد دہشت گردی ایکٹ 1997 کے تحت خصوصی اختیارات دینے کی منظوری دے دی ہے،کہا گیا کہ رینجرزاور ایف سی شہر میں امن وعامہ برقرار رکھنے کے لئے پولیس کی معاونت کرے گی۔
خیال رہے کہ پی ٹی آئی نے عمران خان کی رہائی کے حوالے سے فیصلہ کن احتجاج کا اعلان کرتے ہوئے اعلان کیا ہے 24 نومبر کو اسلام آباد میں ملک بھر سے کارکنان جمع ہوں گے اور احتجاج کیا جائے گا۔
By 
