وزیرداخلہ کا چیئرمین تحریک انصاف سے رابطہ، دھرنے کی اجازت سے انکار

اسلام آباد: وزیرداخلہ محسن نقوی نے پی ٹی آئی چیئرمین بیرسٹر گوہر سے رابطہ کرکے کہا ہے کہ اسلام آباد ہائیکورٹ کے حکم کی روشنی میں ان کے ساتھ موجودہ صورتحال پر گفتگو کی ہے۔

محسن نقوی نے بیرسٹر گوہر کو اسلام اباد ہائیکورٹ کے حکم کے بعد کی صورتحال سے آگاہ کیا اور کہا کہ ہم اسلام اباد ہائیکورٹ کے حکم کے پابند ہیں۔ کسی جلوس، دھرنے اور ریلی کی اجازت نہیں دے سکتے۔ محسن نقوی نے اس حوالے سے بتایا کہ اسلام آباد ہائی کورٹ کے آرڈر کے مطابق حکومت کو ان سرگرمیوں کی اجازت دینے کا اختیار نہیں ہے۔ محسن نقوی نے بیرسٹر گوہر کو 24 نومبر سے 27 نومبر تک بیلاروس کے صدر کی قیادت میں آنے والے اعلی سطح کے 80 رکنی وفد کی مصروفیات اور تفصیلات سے بھی آگاہ کیا۔

وزیرداخلہ نے کہا کہ بیلاروس کا اعلی سطحی وفد 24 نومبر کو اسلام آباد پہنچ رہا ہے، جبکہ بیلاروس کے صدر 25 نومبر کو پاکستان آئیں گے، وزیرداخلہ کے مطابق وفد 27 نومبر تک اسلام آباد میں رہے گا۔ بیرسٹر گوہر نے اپنے موقف میں کہا کہ پارٹی مشاورت کے بعد انہیں حتمی رائے سے آگاہ کیا جائے گا۔