بانی پی ٹی آئی کے وکیل فیصل چوہدری نے کہا ہے کہ عمران خان پُرعزم اور حوصلے میں ہیں وہ کسی پریشر میں نہیں آئیں گے ۔
تفصیلات کے مطابق اڈیالہ جیل کے باہر میڈیا سے گفتگو کے دوران فیصل چوہدری کا کہنا تھا کہ بانی پی ٹی آئی پُرعزم اور حوصلے میں ہیں، عمران خان نہ کبھی پہلے جھکے اور نہ آئندہ کسی پریشر کے آگے جھکیں گے۔
فیصل چوہدری نے کہا کہ بشریٰ بی بی گھریلوخاتون ہیں ، انہوں نے عمران خان کا ساتھ دینے کیلئے صعوبتیں برداشت کیں ۔ اتنی اخلاقی گراوٹ آچکی کہ آپ خواتین کو بھی ان معاملات میں نہیں بخشتے۔
فیصل چوہدری نے کہا کہ بانی پی ٹی آئی کا پیغام ہے کہ ہم جیلوں میں رہنے کو تیار ہیں، اصول اور نظریے کی خاطر ہمیشہ کھڑے رہیں گے۔ انہوں نے کہا کہ 8 فروری کو خیبرپختونخوابھرسے قافلے پشاور جمع ہوں گے اور شٹرڈاؤن کریں گے۔
بانی تحریک انصاف کے وکیل فیصل چوہدری نے مزید کہا کہ 9 مئی ہو یا 26 نومبر ہم جوڈیشل کمیشن کا مطالبہ کر رہے ہیں، چیٹرز کبھی بھی نیوٹرل امپائرز کیساتھ نہیں کھیلتے ، ہم نیوٹرل امپائرزکے ساتھ کھیلنا چاہتے ہیں۔
By 
