راولپنڈی کی ضلعی عدلیہ میں ڈیجیٹلائزیشن کا آغاز، وکلاء، سائلین کیلئے آن لائن سہولت کا اعلان

راولپنڈی کی ضلعی عدلیہ نے اپنے عدالتی نظام کو مکمل طور پر ڈیجیٹلائز کر دیا ہے، جس سے تمام عدالتی کارروائیاں آن لائن دستیاب ہیں۔

تفصیلات کے مطابق راولپنڈی کی ضلعی عدلیہ کے عدالتی نظام کو ڈیجیٹلائزڈ کر دیا گیا جس سے وکلاء اور سائلین تمام عدالتی کاروائی کو آن لائن دیکھ اور سن سکتے ہیں۔ راولپنڈی کے 25 ایڈیشنل ڈسٹرکٹ اینڈ سیشن ججوں اور 75 سول اینڈ فیملی ججوں کے سامنے طے شدہ تمام مقدمات تک وکلاء اور مدعیان اپنے گھروں سے رسائی حاصل کر سکتے ہیں۔

پنجاب کی ضلعی عدلیہ نے ضلعی عدلیہ پنجاب کے نام سے ایک مخصوص موبائل ایپلیکیشن شروع کی ہے، جس میں صوبے کے تمام 43 اضلاع کی عدالتوں کی تفصیلات شامل ہیں۔ اس ایپ کے ذریعے وکلاء، قانونی چارہ جوئی کرنے والے اور ملزم بھی جج کا نام یا کیس نمبر درج کر کے کیس کی کارروائی کو چیک کر سکتے ہیں۔

ایپ ضمانت کی درخواستوں، کیس کی سماعتوں اور نئی تاریخوں کے بارے میں معلومات کے ساتھ روزانہ اپ ڈیٹ ہوتی ہے۔ سپریم کورٹ کے چیف جسٹس، لاہور ہائی کورٹ کے چیف جسٹس اور بیرون ملک مقیم پاکستانی بھی اس پلیٹ فارم کے ذریعے عدالتی کارروائی کی نگرانی کر سکتے ہیں۔

ڈسٹرکٹ بار کے صدر سردار منظر بشیر اور سپریم کورٹ کے ایڈووکیٹ شانزیب خان نے اسے ماتحت عدلیہ میں “ڈیجیٹل انقلاب” قرار دیا۔انہوں نے نوٹ کیا کہ یہ اقدام مقدمے کی تازہ کاری کے لیے عدالتی عملے پر انحصار کرنے کی ضرورت کو ختم کرتا ہے، جس سے قانونی نظام زیادہ شفاف اور قابل رسائی ہو جاتا ہے۔ ایپ میں راولپنڈی کی سب ڈویژنل عدالتوں گوجر خان، ٹیکسلا، کلر سیداں، مری، کہوٹہ اور کوٹلی ستیاں کے کیس کا ڈیٹا بھی شامل ہے۔