پی ٹی آئی کے مزید رہنمائوں کے وارنٹ گرفتاری جاری

حقیقی مارچ کیسز میں پاکستان تحریک انصاف کے رہنمائوں کے وارنٹ گرفتاری جاری کر دیے گئے۔

تفصیلات کے مطابق ڈسٹرکٹ اینڈ سیشن کورٹس اسلام آباد نے حقیقی آزادی مارچ کیسز میں پی ٹی آئی رہنمائوں کے وارنٹ گرفتاری جاری کر دیے۔

مزید پڑھیں: پی ٹی آئی کی احتجاجی تحریک کی کوئی فکر نہیں: وفاقی وزیر اطلاعات عطا اللہ تارڑ

سینئر سول جج محمد عباس شاہ نے پی ٹی آئی حقیقی مارچ پر درج 2 کیسز کی سماعت کی۔ دونوں مقدمات میں عمران خان سمیت دیگر پی ٹی آئی رہنما نامزد ہیں، مقدمے میں نامزد کوئی بھی ملزم عدالت میں پیش نہیں ہوا۔

عدالت نے عدم پیشی پر علی نواز اعوان، راجا خرم نواز و دیگر کے وارنٹ گرفتاری جاری کر دیے۔ ملزمان کی بریت کی درخواست پر آج بھی دلائل نہ ہوسکے۔ جج محمد عباس شاہ نے کہا کہ ملزمان کی موجودگی میں بریت کی درخواستیں سنوں گا، جس پر وکیل درخواستگزار نے کہا کہ اس سے پہلے متعدد کیسز میں عمران خان کی غیر موجودگی میں دلائل ہوئے اور وہ بری ہوئے ہیں۔

عدالت نے دونوں کیسز کی سماعت 23اپریل تک ملتوی کردی ۔