امام الحق کے چہرے پر گیند لگ گئی، ریٹائرڈ ہرٹ ہو کر گراؤنڈ سے باہر

پاکستان کے اوپنر بلے باز امام الحق نیوزی لینڈ کے خلاف تیسرے اور آخری ون ڈے میچ میں فیلڈر کی تھرو لگنے سے زخمی ہو کر گراؤنڈ سے باہر چلے گئے، وہ اس وقت 1 رنز پر کھیل رہے تھے۔

ہفتہ کے روز ماؤنٹ مونگانوئی کرکٹ گراؤنڈ میں کھیلے جا رہے میچ میں نیوزی لینڈ کے 264 رنز کے تعاقب میں قومی ٹیم کی بیٹنگ کے دوران اوپنر بیٹر امام الحق کو بھاگتے ہوئے فیلڈر کی زوردار تھرو ہیلمٹ کے گرل سے ہوتی ہوئی چہرے پر جا لگی جس سے وہ زمین پر گر گئے۔ بعد ازاں انہیں گراؤنڈ سے باہر لے جایا گیا۔

ٹیم انتظامیہ کا کہنا ہے کہ فیلڈر کی زور دار تھرو امام الحق کے جبڑے پر لگی جس کے بعد امام الحق کا کن کشن ٹیسٹ کیا گیا جو وہ پاس نہ کر سکے اور انہیں گراؤنڈ سے باہر لے جایا گیا، جس کے بعد ان کی جگہ عثمان خان کو بیٹنگ کے لیے بھیجا گیا۔

ٹیم انتظامیہ کا کہنا ہے کہ امام الحق کو اسٹیڈیم کے ایمرجنسی سینٹر میں طبی امداد دی جا رہی ہے، جہاں سے انہیں اسپتال لےجایا جائےگا۔

واضح رہے کہ نیوزی لینڈ نے پاکستان کو تیسرے ایک روزہ میچ میں جیت کے لیے 42 اوورز میں 265 رنز کا ہدف دیا ہے۔ نیوزی لینڈ کو 3 ایک روزہ میچوں کی سیریز میں 2 صفر کی فیصلہ کن سبقت حاصل کر رکھی ہے۔

یہ بھی یاد رہے کہ نیوزی لینڈ کے خلاف دوسرے میچ میں حارث رؤف کو بھی بیٹنگ کے دوران ہیلمٹ پر گیند لگی تھی جس کے بعد وہ گراؤنڈ سے باہر چلے گئے تھے۔