پاکستان لانگ رینج رائفل ٹیم کی عالمی میدان میں شاندار کامیابی، ڈبل گولڈ میڈل جیت کر نئی تاریخ رقم

پاکستان لانگ رینج رائفل ٹیم کی اعلیٰ کارکردگی کی شاندار روایت کا سلسلہ جاری ہے ، ٹیم نے جنوبی افریقہ میں منعقدہ ایف کلاس نیشنل لانگ رینج چیمپئن شپ 2025 میں اپنی شاندار کارکردگی کی روایت برقرار رکھتے ہوئے شاندار کامیابی حاصل کی ہے۔

پاکستانی ٹیم نے دونوں مقابلے جیت کر دنیا کی نمبر ون ٹیم جنوبی افریقہ کو ان کی اپنی سرزمین پر شکست دے دی ، چیمپئن شپ سے قبل مارچ میں پاکستانی ٹیم نے جنوبی افریقہ میں چار روزہ ونڈ ٹریننگ کیمپ میں شرکت کی، جو 27 سے 30 مارچ تک جاری رہا۔

اس کیمپ کی نگرانی جنوبی افریقی ماہر کوچز ہینی گربر اور جولیئس ہارٹمین نے کی۔ کیمپ کا مقصد برطانیہ میں ہونے والی یورپین ایف کلاس ٹیمز چیمپئن شپ 2025 اور ورلڈ چیمپئن شپ 2026 کی تیاری تھا۔

ٹیم ایونٹس میں، وائس پریذیڈنٹ ٹیم میچ میں پاکستان نے 1200 میں سے 1168 اسکور کرکے گولڈ میڈل حاصل کیا، جبکہ چیئرمینز ٹیم کپ میں 1200 میں سے 1174 کا شاندار اسکور کرکے ایک اور گولڈ میڈل اپنے نام کیا۔

یہ بھی پڑھیں : سپریم کورٹ نے والد کی جگہ بیٹی کو نوکری کیلئے اہل قرار دے دیا

پاکستانی ٹیم میں لیفٹیننٹ جنرل احسن، اسد وحید، عبید ابراہیم، حذیفہ گل، جنید وقاص، لیفٹیننٹ کرنل جنید علی اور سپاہی ولید شامل تھے، جنہوں نے اپنی مہارت اور مہارت سے پاکستان کا پرچم بلند کیا۔ جنوبی افریقی کوچز ہینی گربر اور جولیئس ہارٹمین نے ٹیم کی کوچنگ کی ذمہ داریاں نبھائیں۔

انفرادی مقابلوں میں بھی پاکستان نے شاندار کارکردگی کا مظاہرہ کرتے ہوئے مجموعی طور پر 11 تمغے حاصل کیے، جن میں 5 گولڈ، 3 سلور اور 3 برونز شامل ہیں۔ لیفٹیننٹ کرنل جنید علی نے سب سے زیادہ 3 گولڈ، 2 سلور اور 2 برونز میڈل جیت کر انفرادی سطح پر بہترین کارکردگی دکھائی، جبکہ سکاٹش سوورڈ میچ میں سپاہی ولید نے گولڈ میڈل اپنے نام کیا۔

یہ کامیابیاں میرٹ پر مبنی ٹیم سلیکشن، نظم و ضبط، لگن اور مسلسل محنت کی عکاس ہیں جو پاکستان کے وقار کو عالمی سطح پر بلند کر رہی ہیں ، آرمی چیف کے اعتماد، تعاون اور حوصلہ افزائی کے ساتھ پاکستانی ٹیم اپنا مشن جاری رکھے گی تاکہ وطن کا نام مزید روشن ہو۔