پاکستانی وزارتوں اور ڈویژن پر بھارتی سائبر حملے ناکام بنادیے، وفاقی وزیر آئی ٹی کی تصدیق

پانی پر بس نہ چلا تو اوچھے ہتھکنڈوں سے بھارت سائبر دہشتگردی پر اتر آیا، وفاقی وزیر آئی ٹی شزا فاطمہ نے تصدیق کی ہے کہ  مختلف وفاقی وزارتوں پر سائبر حملے کیے گئے، پاکستان نے کامیابی سے دشمن کے سائبر حملے ناکام بنا دیئے ۔

وفاقی وزیر آئی ٹی شزا فاطمہ نے بتایا کہ بھارت کے سائبر حملوں سے کوئی بہت بڑا مسئلہ نہیں آیا، سائبر حملوں کا کوئی اثر ٹیلی کام پر نہیں آیا، وفاقی وزارتوں کی ویب سائٹس کی ہوسٹنگ این ٹی سی پر ہے، این ٹی سی کے پاس سائبر سیکورٹی کا بہترین سسٹم ہے۔

وفاقی وزیر نے کہا کہ  قومی اور صوبائی سطح پر کمپیوٹر ایمرجنسی رسپانس ٹیمز تشکیل دی جاچکی ہیں،  وفاقی اور صوبائی سائبر سیکورٹی کے حوالے سے شہریوں کو آگاہی دے رہی ہیں ، کمپیوٹر ایمرجنسی رسپانس ٹیمز کی جانب سے ایڈوائزریاں جاری کی جارہی ہیں۔

شزہ فاطمہ خواجہ نے کہا کہ سائبر حملوں سے متعلق این ٹی آئی ایس بی بھی فعال ہے، پاکستان سائبر سیکورٹی کے لحاظ سے ٹاپ ممالک کی فہرست میں شامل ہے، گزشتہ دو سالوں میں پاکستان سائبر سیکورٹی کے لحاظ سے ٹاپ ٹیئر ممالک میں آیا ہے، پاکستان کا نام امریکہ، یو کے اور ان جیسے ممالک کی فہرست میں آیا ہے،سوشل میڈیا پر ہونے والی جنگ پر پاکستانی نوجوانوں کو داد دیتی ہوں ۔

ان کامزید کہنا تھا کہ پاکستانی میمز بنا کر پاک بھارت کشیدگی کو انجوائے کر رہے ہیں ، لوگ سوشل میڈیا پر اتنی کشیدہ صورتحال کو بھی اپنے انداز میں بیان کررہے ہیں، پاکستان نے پہلگام واقعے کی مذمت کی ہے،  ہم پاکستانی کسی ڈرنے والے نہیں ہیں۔