بھارت کی جانب سے پاکستان کے نیٹ ورکس پر سائبر حملوں کا خطرہ، نئی ایڈوائزری جاری

پاکستان پر بھارت کی جانب سے بلا اشتعال بزدلانہ جارحیت کے بعد خطے میں سلامتی کی صورتحال کو لاحق خطرات میں اضافے کے پیش نظر نیشنل سائبر ایمرجنسی رسپانس ٹیم (سی ای آر ٹی) نے پاکستان کے اہم انفراسٹرکچر کو نقصان پہنچانے والے بھارتی سائبر حملوں سے خبردار کیا ہے۔

نیشنل سائبر ایمرجنسی رسپانس ٹیم کی جانب سے جاری ایڈوائزری میں موجودہ جیو پولیٹیکل تناؤ سے فائدہ اٹھانے کے لیے دشمن عناصر کی کوششوں کا حوالہ دیا گیا ہے اور اس بات پر زور دیا گیا ہے کہ سائبر خطرات اور غلط معلومات والی سرگرمیاں تیزی سے پاکستان کے نیٹ ورکس کو نشانہ بنا رہی ہیں۔

یہ بھی پڑھیں:پاکستان پر بلااشتعال بھارتی جارحیت سے خطے کا امن خطرے میں پڑ گیا ہے، اسحاق ڈار

سی ای آر ٹی ایڈوائزری میں متنبہ کیا گیا ہے کہ یہ مخالفین عوام کو گمراہ کرنے اور پاکستان کے انفارمیشن ایکو سسٹم میں خلل ڈالنے کے لئے جدید ترین سائبر حکمت عملی کا استعمال کر رہے ہیں۔ ایڈوائزری کے مطابق، حملہ آور گمراہ کن پیغامات، جعل سازی کی اسکیموں اور جھوٹی کہانیوں کو پھیلانے جیسے ہتھکنڈوں کا استعمال کر رہے ہیں، یہ سب الجھن اور عدم استحکام پیدا کرنے کے لئے ڈیزائن کیے گئے ہیں۔

ایڈوائزری میں کہا گیا ہے کہ دشمن عناصر موجودہ صورتحال کا فائدہ اٹھاتے ہوئے غلط معلومات پھیلا رہے ہیں اور اہم شعبوں پر سائبر حملے کر رہے ہیں۔ ان کا مقصد افراتفری کا بیج بونا اور لائن آف کنٹرول (ایل او سی) پر جاری کشیدگی سے پیدا ہونے والی غیر یقینی صورتحال سے فائدہ اٹھانا ہے۔

ایڈوائزری میں عوام پر زور دیا گیا ہے کہ وہ سوشل میڈیا پلیٹ فارمز کے ذریعے پاکستان پر سائبر حملوں سے متعلق غیر مصدقہ معلومات یا افواہیں شیئر کرنے سے گریز کریں۔ اس میں مشکوک لنکس، ای میلز یا سوشل میڈیا پوسٹس کے ساتھ بات چیت کرتے وقت احتیاط برتنے کی بھی سفارش کی گئی ہے اور شہریوں پر زور دیا گیا ہے کہ وہ صرف قابل اعتماد، سرکاری ذرائع سے آنے والے کسی بھی پیغام یا خبر کی تصدیق کریں۔

یہ بھی پڑھیں : بھارتی بزدلانہ حملے کا جواب ، بھارتی 6 مہار کا بٹالین ہیڈ کوارٹر تباہ

ایڈوائزری میں زور دیا گیا ہے کہ معلومات صرف قابل اعتماد اور مستند چینلز سے حاصل کی جانی چاہییں۔ افواہوں یا پیغامات کو پھیلانے سے گریز کریں جن کی سرکاری طور پر تصدیق نہیں کی گئی ہے۔ غیر مصدقہ اپ ڈیٹس، خاص طور پر واٹس ایپ اور دیگر سوشل میڈیا جیسے پلیٹ فارمز پر گردش کرنے والی اپ ڈیٹس، غلط بیانیے میں حصہ ڈال سکتی ہیں۔

یہ ایڈوائزری پاکستان کے متعدد علاقوں میں بھارتی فوج کی دراندازی کے بعد پاکستان اور بھارت کے درمیان بڑھتی ہوئی کشیدگی کے تناظر میں سامنے آئی ہے۔ گزشتہ رات بھارت نے پاکستان کے شہری مراکز کو نشانہ بناتے ہوئے فضائی حملہ کیا تھا جس کے بعد پاکستان کی مسلح افواج کی جانب سے فوری اور مضبوط فوجی جواب دیا گیا تھا۔

پاکستانی فوج نے جوابی کارروائی میں اہم کامیابی حاصل کرتے ہوئے 3 رافیل طیاروں سمیت 5 بھارتی طیاروں کو مار گرایا اور ایل او سی پر ایک بریگیڈ ہیڈکوارٹر سمیت متعدد فوجی چوکیوں کو تباہ کردیا۔ شکست کا اعتراف کرتے ہوئے، بھارتی فوج نے چورا کمپلیکس میں ایک سفید پرچم لہرایا، جو اس سیکٹر پر امن کی اپیل کی جانب اشارہ ہے۔

مزید پڑھیں:پاکستان پر حملہ کیا تو بھارت کی 7 ریاستوں پر قبضہ کرلیں گے، بنگلادیشی میجر جنرل کا دعویٰ

حکومت نے عوام پر زور دیا ہے کہ وہ غلط معلومات اور سائبر جنگ سے پیدا ہونے والے چیلنجز کو تسلیم کرتے ہوئے اس مشکل وقت کے دوران محتاط اور ذمہ دار رہیں۔ وزارت اطلاعات و نشریات نے شہریوں کو غلط معلومات کے پھیلاؤ کو روکنے کے لیے فعال کردار ادا کرنے کی ضرورت پر زور دیتے ہوئے انہیں سرکاری چینلوں سے تصدیق شدہ اپ ڈیٹس کو ترجیح دینے کا مشورہ دیا۔