پی ٹی آئی کے وزیرہوا بازی غلام سرور نےپی آئی اے پر پابندی لگوا کر قومی جرم کیا، خواجہ آصف

دفاع اور ہوا بازی کے وفاقی وزیر خواجہ آصف نے برطانیہ کی جانب سے پاکستان ایئرلائن (پی آئی اے) پر سے برطانیہ کی جانب سے عائد پابندی ہٹائے جانے کو خوش آئند قرار دیتے ہوئے فوری نجکاری کا اعلان کیا ہے۔

یہ بھی پڑھیں:پاکستان کے لیے بڑی خوشخبری، برطانیہ نے ایئر سیفٹی لسٹ سے نکال دیا، براہ راست پروازوں کی راہ ہموار

بدھ کو اسلام آباد میں پریس کانفرنس سے خطاب کرتے ہوئے دفاع اور ہوا بازی کے وفاقی وزیر خواجہ آصف نے تصدیق کی کہ برطانیہ نے پاکستان ایئر لائن اور ایک اور نجی پرواز کو برطانیہ کی ایئر سیفٹی لسٹ سے نکال دیا ہے جو پاکستان کے لیے ایک بہت بڑی کامیابی ہے۔

شہباز شریف کی حکومت نے ایک اور سنگ میل عبور کر لیا۔ 3سال کی لُگاتار محنت رنگ لائ۔
عمران خان اور اسکا ھوا بازی کا وزیر غلام سرور PIA کو کھنڈرات میں چھوڑ گئے تھے آج پھر سبز ھلالی پرچم فخر کے ساتھ فضاؤں میں بلند ھو رہا ھے۔ ایویشن منسٹر ی کی انتھک محنت اور کمٹمنٹ رنگ لائ۔ پاکستان…

— Khawaja M. Asif (@KhawajaMAsif) July 16, 2025

انہوں نے پاکستان تحریک انصاف کے بانی چیئرمین عمران خان اور سابق وزیر ہوا بازی غلام سرور خان پر شدید تنقید کرتے ہوئے کہا کہ سابق وزیر ہوا بازی کے غیر ذمہ دارانہ بیان نے ملک کو نا قابل تلافی نقصان پہنچایا ہے، ان کے غیر ذمہ دارانہ بیان سے ہمارے وقار اور ساکھ کو نقصان پہنچا اس کے ذمہ داروں کو سزا ملنی چاہیے۔

انہوں نے کہا کہ بانی پی ٹی آئی اور ان کے وزیر ’پی آئی اے ‘ کو کھنڈر بنا کر چلے گئے تھے، غلام سرور خان کے بیان سے قومی ایئر لائن کو اربوں روپے کا نقصان ہوا، موجودہ حکومت نے اپنی بھرپور سفارتی کوششوں کے ساتھ دوبارہ بحال کرنے کی کوشش کی۔

انہوں نے کہا کہ پی آئی اے پر یورپ کے لیے پروازوں پر پابندی سے اوورسیز پاکستانیوں کو شدید صدمہ ہوا، اب پابندی ختم ہونے سے قومی ایئر لائن کی نجکاری میں بھی فائدہ حاصل ہوگا۔

خواجہ محمد آصف نے کہا کہ تمام روٹس کی بحالی سے نجکاری سے قبل پی آئی اے کی قدرمیں بہتری آئے گی، انہوں نے یہ بھی کہا کہ نیویارک کے لیے پروازیں دوبارہ شروع کرنے کا منصوبہ بھی بنا رہے ہیں، نیویارک کے لیے پروازوں پر کوئی پابندی نہیں لیکن اسے دوبارہ شروع کرنا چاہتے ہیں۔