سونا مزید ہزاروں روپے مہنگا ہوگیا،گولڈ مارکیٹ سے بڑی خبر

 پیر کے روز پاکستان کی مقامی صرافہ مارکیٹ میں سونے اور چاندی کی قیمتوں میں نمایاں اضافہ ریکارڈ کیا گیا ہے، جس کے باعث خریداروں اور سرمایہ کاروں میں تشویش دیکھی جا رہی ہے۔

آل پاکستان صرافہ، جیمز اینڈ جیولرز ایسوسی ایشن کے مطابق مقامی مارکیٹ میں فی تولہ سونے کی قیمت میں ایک ہی دن میں 5 ہزار 300 روپے کا بڑا اضافہ ہوا، جس کے بعد فی تولہ سونا 5 لاکھ 24 ہزار 762 روپے کی سطح پر پہنچ گیا۔ اسی طرح 10 گرام سونے کی قیمت میں بھی 4 ہزار 544 روپے اضافہ ہوا اور نئی قیمت 4 لاکھ 49 ہزار 898 روپے مقرر کی گئی۔

یہ بھی پڑھیں:سونے کی قیمتوں میں حیرت انگیز کمی،گولڈ مارکیٹ میں بڑی ہلچل

صرافہ ایسوسی ایشن کا کہنا ہے کہ مقامی قیمتوں میں اضافے کی بنیادی وجہ عالمی مارکیٹ میں سونے کی قیمتوں میں تیزی ہے۔ عالمی سطح پر فی اونس سونے کی قیمت میں 53 ڈالر کا اضافہ ریکارڈ کیا گیا، جس کے بعد عالمی قیمت 5 ہزار 20 ڈالر فی اونس تک پہنچ گئی۔

دوسری جانب چاندی کی قیمت میں بھی اضافہ دیکھا گیا ہے۔ مقامی مارکیٹ میں فی تولہ چاندی 346 روپے مہنگی ہو کر 8 ہزار 615 روپے میں فروخت ہو رہی ہے۔

مارکیٹ تجزیہ کاروں کے مطابق اتوار کی چھٹی کے بعد کاروباری سرگرمیوں کے دوبارہ آغاز اور عالمی قیمتوں میں اضافے کے اثرات براہِ راست مقامی صرافہ مارکیٹ پر مرتب ہوئے ہیں۔ قیمتوں میں اچانک اضافے کے باعث سرمایہ کاروں اور چھوٹے خریداروں کی جانب سے محتاط رویہ اختیار کیا جا رہا ہے۔