پاکستان اسٹاک ایکسچینج کریش کر گئی

ملک کی مالیاتی تاریخ میں ایک ہنگامہ خیز دن دیکھنے میں آیا جب پاکستان اسٹاک ایکسچینج میں بدترین مندی ریکارڈ کی گئی۔ کاروباری ہفتے کے پہلے روز ہی منڈی میں شدید دباؤ دیکھنے میں آیا اور سرمایہ کاروں میں خوف و ہراس پھیل گیا۔

میڈیا رپورٹس کے مطابق ہنڈرڈ انڈیکس میں 15 ہزار سے زیادہ پوائنٹس کی غیر معمولی کمی ریکارڈ کی گئی جس کے بعد انڈیکس گر کر ایک لاکھ 52 ہزار 717 پوائنٹس کی سطح پر آ گیا۔ ماہرین اسے ملکی تاریخ کی سب سے بڑی یومیہ مندی قرار دے رہے ہیں۔ واضح رہے کہ گزشتہ کاروباری ہفتے کے آخری روز ہنڈرڈ انڈیکس ایک لاکھ 68 ہزار 62 پوائنٹس پر بند ہوا تھا، تاہم آج مارکیٹ کھلتے ہی فروخت کا شدید دباؤ دیکھنے میں آیا۔

یہ بھی پڑھیں: پاکستان اسٹاک ایکسچینج میں ریکارڈ تیزی ، انڈیکس تاریخ کی بلند ترین سطح پر

شدید مندی کے باعث حصص کی قیمتیں تیزی سے گرنے لگیں اور صورتحال اس قدر سنگین ہو گئی کہ انتظامیہ کو عارضی طور پر کاروبار روکنا پڑا۔ ٹریڈنگ معطل ہونے سے سرمایہ کاروں میں بے چینی مزید بڑھ گئی جبکہ بروکریج ہاؤسز میں غیر یقینی کی کیفیت چھا گئی۔

معاشی تجزیہ کاروں کے مطابق مشرق وسطیٰ میں جاری کشیدگی، عالمی منڈیوں میں اتار چڑھاؤ اور سرمایہ کاروں کے اعتماد میں کمی اس مندی کی بڑی وجوہات ہیں۔ ان کا کہنا ہے کہ بیرونی سرمایہ کاری میں کمی اور مقامی سطح پر غیر یقینی صورتحال نے مارکیٹ کو شدید متاثر کیا ہے۔

کاروباری برادری کا کہنا ہے کہ اگر خطے میں کشیدگی برقرار رہی اور عالمی مالیاتی دباؤ میں اضافہ ہوا تو مقامی منڈی مزید دباؤ کا شکار ہو سکتی ہے۔ دوسری جانب حکومت اور مالیاتی اداروں کی جانب سے صورتحال کا جائزہ لیا جا رہا ہے اور سرمایہ کاروں کے اعتماد کی بحالی کے لیے ممکنہ اقدامات پر غور کیا جا رہا ہے۔

ماہرین خبردار کر رہے ہیں کہ اس قسم کی شدید مندی نہ صرف سرمایہ کاروں بلکہ ملکی معیشت پر بھی گہرے اثرات مرتب کر سکتی ہے۔ چھوٹے سرمایہ کاروں کو سب سے زیادہ نقصان کا خدشہ ہے جبکہ بینکنگ، توانائی اور صنعتی شعبے کے حصص نمایاں طور پر متاثر ہوئے ہیں۔