پیٹرول مہنگا، موٹر سائیکل پر سبسڈی کیلئے موبائل ایپلیکیشن تیار ، ذرائع

حکومت نے موٹر سائیکل اور رکشہ سواروں کو پیٹرول پر سبسڈی فراہم کرنے کے لیے ایک موبائل ایپلیکیشن تیار کرلی ہے، ذرائع کے مطابق اس منصوبے پر عملدرآمد جلد شروع کیا جائے گا۔

میڈیا رپورٹ کے مطابق ذرائع کا کہنا ہے کہ ابتدائی مرحلے میں صرف 70 سی سی موٹر سائیکلوں اور رکشوں کو سبسڈی دی جائے گی، جبکہ 70 سی سی سے زائد موٹر سائیکل اس اسکیم کے تحت اہل نہیں ہوں گے۔

یہ بھی پڑھیں : پیٹرول کی قیمتیں آسمان پر، موٹر سائیکل سوار 2 ہزار روپے نقد کیسے حاصل کرسکتے ہیں؟

اہل سواروں کو ماہانہ 20 لیٹر پیٹرول پر فی لیٹر 100 روپے سبسڈی فراہم کی جائے گی۔

اس اسکیم کے تحت موٹر سائیکلوں اور رکشوں کی رجسٹریشن وزارتِ آئی ٹی و ٹیلی کمیونیکیشن کے تعاون سے کی جائے گی،  پیٹرول کی فراہمی اور سبسڈی کے کوٹے کی نگرانی بھی اسی موبائل ایپلیکیشن کے ذریعے کی جائے گی۔

یہ بھی پڑھیں : کڑے وقت میں حقیقی ریلیف، وفاق ، پنجاب میں بس اور ٹرین کا سفر مفت! پختونخوا حکومت کی بے حسی عروج پر، عوام آسانی کو ترس گئی

ذرائع کے مطابق آئندہ ہفتے سے موٹر سائیکل اور رکشہ سواروں کو کوٹے کی بنیاد پر فی لیٹر 100 روپے سبسڈی کے ساتھ پیٹرول فراہم کیے جانے کا امکان ہے۔

یاد رہے کہ حکومت نے گزشتہ روز پٹرول کی قیمت میں 137.23 روپے اضافہ کرتے ہوئے نئی قیمت 458 روپے 41 پیسے جبکہ ہائی سپیڈ ڈیزل کی فی لیٹر قیمت 184.49 روپے بڑھاتے ہوئے نئی قیمت 520 روپے 35 پیسے مقرر کر دی ہے۔