حکومت نے پٹرولیم مصنوعات کی نئی قیمتوں کا اعلان کردیا

حکومت نے پٹرولیم مصنوعات کی قیمتوں میں اضافے کا اعلان کیا ہے۔ وزیر خزانہ محمد اورنگزیب نے پریس کانفرنس میں کہا کہ پٹرول کی قیمت میں 137 روپے فی لیٹر جبکہ ڈیزل کی قیمت میں 184 روپے فی لیٹر اضافہ کیا گیا ہے۔ نئی قیمتوں کے مطابق ڈیزل کی قیمت 520 روپے 35 پیسے فی لیٹر تک پہنچ گئی ہے۔

اس کے ساتھ ہی وزیر خزانہ نے موٹر سائیکل استعمال کرنے والوں کے لیے ایک اہم اعلان کیا۔ انہوں نے بتایا کہ موٹر سائیکل سواروں کو 20 لیٹر پٹرول پر 100 روپے کی سبسڈی دی جائے گی۔

یہ سبسڈی تین ماہ کے لیے فراہم کی جائے گی تاکہ عوام کو قیمتوں میں اضافے کے اثرات سے کچھ ریلیف مل سکے۔

وزیر خزانہ نے مزید کہا کہ حکومت ملک میں مارکیٹ کے اوقات کار پر بھی نظرثانی کرنے جا رہی ہے تاکہ مہنگائی پر قابو پایا جا سکے اور معاشی سرگرمیوں کی روانی برقرار رکھی جا سکے۔

اسی دوران، حکومت نے ٹرانسپورٹرز کے لیے بھی سبسڈی کا اعلان کیا۔ مسافر بسوں کے لیے ایک لاکھ روپے ماہانہ سبسڈی دینے کا فیصلہ کیا گیا ہے، جبکہ مال بردار گاڑیوں (گڈز ٹرانسپورٹرز) کے لیے 70 ہزار روپے ماہانہ سبسڈی فراہم کی جائے گی۔

یہ بھی پڑھیں: امریکہ ایران کشیدگی کے بعد کتنے ممالک میں پٹرول مہنگا ہوا، سب سے زیادہ قیمت کس نے بڑھائی؟

اس کے علاوہ، مال بردار گاڑیوں کو 100 روپے فی لیٹر سبسڈی بھی دی جائے گی۔ وزیر خزانہ نے کہا کہ وفاقی حکومت نے پاکستان ریلوے کو بھی سبسڈی فراہم کرنے کا فیصلہ کیا ہے تاکہ عوامی نقل و حمل کے شعبے کی سہولت اور کارکردگی میں بہتری آئے۔