By پاکستان اور کویت کے درمیان دہائیوں پر محیط معاشی تعلقات میں ایک نیا اور اہم موڑ سامنے آیا ہے، جہاں کویت نے پاکستان کو ڈیزل اور جیٹ فیول کی ترسیل کے لیے ہر ممکن سہولت فراہم کرنے کی یقین دہانی کرا دی ہے۔
تفصییلات کے مطابق یہ پیشرفت وفاقی وزیر پیٹرولیم علی پرویز ملک اور کویت کے سفیر ناصر عبدالرحمان جاسم المطیری کے درمیان ہونے والی ایک اہم ملاقات میں ہوئی، جس کا مقصد توانائی کے شعبے میں دو طرفہ تعاون کو مزید مستحکم کرنا ہے۔
اس ملاقات کے دوران کویت پیٹرولیم کارپوریشن کی جانب سے پاکستانی پرچم بردار جہازوں کو ایندھن کی لوڈنگ اور ترسیل میں ترجیحی سہولیات دینے کا عزم ظاہر کیا گیا۔ تاریخی تسلسل: پاکستان گزشتہ 50 برسوں سے کویت سے ڈیزل درآمد کر رہا ہے، جو دونوں ممالک کے درمیان گہرے اعتماد کی علامت ہے۔کویت اب پاکستانی جہازوں کو ڈیزل اور جیٹ فیول کی لوڈنگ کے لیے خصوصی پروٹوکول اور سہولیات فراہم کرے گا۔
کویتی سفیر نے خطے میں استحکام کے لیے پاکستان اور وزیراعظم شہباز شریف کے امن پسندانہ کردار کو بھی سراہا۔ وفاقی وزیر علی پرویز ملک نے کویت کا شکریہ ادا کرتے ہوئے کہا کہ یہ اقدام پاکستان کی توانائی کی ضروریات کو سستا اور آسان بنانے میں مددگار ثابت ہوگا۔
ماہرین کے مطابق، کویت کی جانب سے ان سہولیات کی فراہمی سے پاکستان کے لیے ایندھن کی سپلائی چین مزید محفوظ ہو جائے گی اور لاجسٹک اخراجات میں کمی آنے کا امکان ہے۔
ملاقات کے اختتام پر دونوں رہنماؤں نے اس عزم کا اعادہ کیا کہ مستقبل میں توانائی کے ساتھ ساتھ دیگر تجارتی شعبوں میں بھی تعاون کے نئے افق تلاش کیے جائیں گے۔
مزید پڑھیں: تیل کی قیمتوں میں اضافے کے بعد سونا اور چاندی بھی بے قابو، عالمی مارکیٹ میں بڑا اضافہ
