سیکیورٹی صورتحال اور امن و امان کو برقرار رکھنے کے پیش نظر ضلع راولپنڈی کی ریونیو حدود میں 7 فروری سے 21 فروری 2026 تک 15 دنوں کے لیے دفعہ 144 نافذ کر دی گئی ہے۔ اس حوالے سے ڈپٹی کمشنر راولپنڈی حسن وقار چیمہ نے باقاعدہ نوٹیفکیشن جاری کر دیا ہے۔
جاری کردہ نوٹیفکیشن کے مطابق راولپنڈی بھر میں ہر قسم کے جلسے، جلوس، اجتماعات، دھرنوں اور ریلیوں پر مکمل پابندی عائد کر دی گئی ہے، جبکہ 5 یا اس سے زائد افراد کے اکٹھا ہونے پر بھی پابندی لاگو ہو گی۔ انتظامیہ کے مطابق یہ فیصلہ عوامی تحفظ اور ممکنہ امن و امان کی صورتحال سے نمٹنے کے لیے کیا گیا ہے۔
نوٹیفکیشن میں واضح کیا گیا ہے کہ اسلحے کی نمائش، اسلحہ لے کر چلنے اور کسی بھی قسم کی نفرت انگیز یا اشتعال انگیز تقاریر پر بھی مکمل پابندی ہو گی۔ اس کے علاوہ ٹریفک کی روانی میں خلل ڈالنے والے اقدامات، ڈبل سواری اور لاؤڈ اسپیکر کے استعمال پر بھی دفعہ 144 کے تحت پابندی عائد کر دی گئی ہے۔
ضلعی انتظامیہ کے مطابق یہ اقدام ڈسٹرکٹ انٹیلیجنس کمیٹی کے اجلاس کے دوران پیش کی گئی سفارشات کی روشنی میں اٹھایا گیا ہے، جس میں ممکنہ سیکیورٹی خدشات، حساس صورتحال اور امن و امان کو درپیش خطرات کا تفصیلی جائزہ لیا گیا تھا۔
انتظامیہ نے واضح کیا ہے کہ دفعہ 144 کی خلاف ورزی کرنے والوں کے خلاف سخت قانونی کارروائی عمل میں لائی جائے گی، جس میں گرفتاری، جرمانہ اور دیگر تعزیری اقدامات شامل ہو سکتے ہیں۔ پولیس اور ضلعی افسران کو ہدایت جاری کر دی گئی ہیں کہ وہ پابندیوں پر سختی سے عمل درآمد یقینی بنائیں۔
شہری حلقوں کا کہنا ہے کہ اگرچہ یہ اقدام روزمرہ سرگرمیوں پر اثر انداز ہو سکتا ہے، تاہم مجموعی طور پر شہری امن، سلامتی اور جان و مال کے تحفظ کے لیے اس فیصلے کو ضروری قرار دیا جا رہا ہے۔
انتظامیہ نے عوام سے اپیل کی ہے کہ وہ قانون نافذ کرنے والے اداروں کے ساتھ تعاون کریں، افواہوں سے گریز کریں اور کسی بھی مشکوک سرگرمی کی فوری اطلاع متعلقہ حکام کو دیں۔
By 
