سیاسی رہنماوں کا پی ٹی آئی چھوڑنے کا سلسلہ جاری، اہم رہنما نے پیپلز پارٹی میں شمولیت اختیار کرلی

لیہ سے پاکستان تحریکِ انصاف (پی ٹی آئی) کے رہنما سجاد حسین المعروف سجن خان نے باضابطہ طور پر پاکستان پیپلزپارٹی میں شمولیت اختیار کر لی۔ سجن خان کی شمولیت کا اعلان چیئرمین پیپلزپارٹی بلاول بھٹو زرداری کی موجودگی میں کیا گیا، جہاں بلاول بھٹو نے انہیں پارٹی میں شامل ہونے پر خوش آمدید کہا۔

اسی موقع پر دربارِ حضرت سلطان باہو کے گدی نشین صاحبزادہ نجیب سلطان نے بھی بلاول بھٹو زرداری سے ملاقات کی اور پیپلزپارٹی کی مکمل حمایت کا اعلان کیا۔ صاحبزادہ نجیب سلطان کا تعلق ایک بااثر مذہبی خاندان سے ہے، اور ان کی حمایت کو اس خطے میں ایک اہم سیاسی پیش رفت سمجھا جا رہا ہے۔ پیپلزپارٹی کے رہنماؤں کے مطابق اس فیصلے سے جنوبی پنجاب میں پارٹی کی پوزیشن مزید مضبوط ہو گی اور اسے انتخابی سطح پر فائدہ حاصل ہوگا۔

مزید برآں، بریگیڈیئر ریٹائرڈ عاصم نواز، سابق سٹی ناظم طاہر اعوان اور دیگر مقامی سیاسی رہنماؤں نے بھی بلاول بھٹو زرداری سے ملاقات کی اور پیپلزپارٹی میں شمولیت کا اعلان کیا۔ پارٹی ذرائع کا کہنا ہے کہ بریگیڈیئر (ر) عاصم نواز کی شمولیت پیپلزپارٹی کی مجموعی سیاسی حکمتِ عملی کے لیے ایک اہم اور فائدہ مند قدم ثابت ہوگی۔

واضح رہے کہ چند روز قبل بھی پی ٹی آئی کے تحصیل صدر میجر (ر) طارق محمود نے ایک پریس کانفرنس کے دوران پی ٹی آئی چھوڑنے کا اعلان کیا تھا، جس کے بعد پیپلزپارٹی میں شامل ہونے والے رہنماؤں کی تعداد میں اضافہ دیکھا جا رہا ہے۔

یہ بھی پڑھیں: پی ٹی آئی نےلبادہ سیاست کا اوڑھا ہوا ہے،کام دہشتگردوں والے ہیں،عطا ء تارڑ

سیاسی تجزیہ کاروں کے مطابق پیپلزپارٹی خصوصاً جنوبی پنجاب میں اپنی انتخابی قوت بڑھانے میں کامیاب ہوتی نظر آ رہی ہے۔ مذہبی شخصیات، مقامی سیاسی رہنماؤں اور سابق عسکری افسران کی مسلسل شمولیت یہ ظاہر کرتی ہے کہ بلاول بھٹو زرداری کی قیادت میں پیپلزپارٹی کی مقبولیت میں اضافہ ہو رہا ہے اور پارٹی اس خطے میں اپنی سیاسی حکمتِ عملی کو کامیابی سے آگے بڑھا رہی ہے۔