بھارتی کرکٹ میں ہلچل، کرپشن کے الزام میں 4 کھلاڑی معطل

بھارتی کرکٹ میں  ایک بار پھر ہلچل مچ گئی ہے، جہاں کرپشن کے سنگین الزامات نے کھیل کی ساکھ کو ہلا کر رکھ دیا ہے،  کرپشن میں مبینہ طور پر ملوث ہونے پر چار کرکٹرز کو فوری طور پر معطل کر دیا گیا ہے۔

بھارتی میڈیا کے مطابق چاروں کرکٹرز کے خلاف گوہاٹی کی کرائم برانچ میں ایف آئی آر بھی درج کرلی گئی ہے۔

کرکٹرز پر کرپشن کے الزامات ڈومیسٹک کرکٹ میں سامنے آئے ہیں ، آسام کرکٹ ایسوسی ایشن نے 4 کرکٹرز کو مبینہ طور پر کرپشن میں ملوث ہونے پر معطل کر دیا۔

آسام کرکٹ ایسوسی ایشن نے پریس ریلیز کے ذریعے کھلاڑیوں کی معطلی کا اعلان کیا۔

مزید پڑھیں: سابق انگلش کرکٹر معین علی کا آئی پی ایل چھوڑ کر پی ایس ایل کھیلنے کا اعلان

سید مشتاق علی ٹرافی کے دوران مبینہ کرپشن میں ملوث ہونے پر کرکٹرز کو معطل کیا گیا ہے، مشتاق علی ٹرافی 26 نومبر سے 8 دسمبر تک منعقد ہوئی ، ان ڈومیسٹک کرکٹرز میں امیت سنہا، ایشان احمد، امن تریپاٹھی اور ابھیشک ٹھاکری شامل ہیں۔

آسام کرکٹ ایسوسی ایشن کا کہنا ہے کہ کرکٹرز نے آسام ٹیم کے موجودہ کرکٹرز کو اکسایا اور اثر انداز ہونے کی کوشش کی۔

بھارتی میڈیا نے کہا کہ کرکٹرز کو کسی بھی سطح پر کھیل کی سرگرمیوں میں حصہ لینے کی اجازت نہیں ہو گی، کرکٹرز تحقیقات کے نتیجے تک معطل رہیں گے۔

مزید پڑھیں:ٹی 20 ورلڈ کپ 2026 میں کن ممالک کی ٹیمیں کھیلیں گی ؟ فہرست سامنے آگئی

اس اچانک اقدام نے نہ صرف کرکٹ حلقوں بلکہ شائقین میں بھی تشویش کی لہر دوڑا دی ہے، جبکہ واقعے کی مکمل تحقیقات کا آغاز کر دیا گیا ہے۔