مقامی الیکٹرک بائیک بنانے والی کمپنی ویلیکٹرا (Vlektra) نے پاکستان میں جدید مسافروں کی ضروریات کو مدنظر رکھتے ہوئے اپنی نئی الیکٹرک بائیک Velocity 180 متعارف کرا دی ہے۔
کمپنی کے مطابق یہ بائیک رفتار، کارکردگی اور آرام دہ سواری کا امتزاج ہے، جو شہری اور بین الاضلاعی سفر دونوں کے لیے موزوں بنائی گئی ہے۔
ویلیکٹرا ویلو سٹی 180 کی زیادہ سے زیادہ رفتار 70 کلومیٹر فی گھنٹہ ہے جبکہ ایک بار مکمل چارج پر یہ بائیک 180 کلومیٹر تک کا فاصلہ طے کر سکتی ہے۔ اس رینج کی بدولت بائیک روزمرہ شہری آمدورفت کے ساتھ ساتھ طویل فاصلے کے سفر کے لیے بھی موزوں قرار دی جا رہی ہے۔
کمپنی کے مطابق ویلو سٹی 180 کو مکمل چارج ہونے میں صرف 3 گھنٹے درکار ہوتے ہیں اور اسے ملک بھر میں دستیاب کسی بھی عام وال آؤٹ لیٹ سے چارج کیا جا سکتا ہے۔ بائیک میں جدید لیتھیم فاسفیٹ بیٹری استعمال کی گئی ہے، جس کی متوقع عمر 15 سال بتائی جا رہی ہے اور یہ بیٹری 3000 چارج سائیکلز کی صلاحیت رکھتی ہے، جس سے اس کی طویل المدتی پائیداری یقینی بنتی ہے۔
حفاظت کے حوالے سے بائیک میں سی بی ایس بریکنگ سسٹم دیا گیا ہے، جس میں فرنٹ ڈرم بریک اور ریئر ڈسک بریک شامل ہیں تاکہ بہتر کنٹرول فراہم کیا جا سکے۔ مختلف سڑکوں اور راستوں پر ہموار سواری کے لیے بائیک میں ہائی پرفارمنس سسپنشن اور شاک ایبزاربنگ فیچرز بھی موجود ہیں۔
ویلو سٹی 180 میں صارفین کی سہولت کے لیے تین مختلف ایکسیلیریشن موڈز دیے گئے ہیں، جن کے ذریعے سوار اپنی ضرورت کے مطابق کارکردگی کو ایڈجسٹ کر سکتے ہیں۔ بائیک کا ایل ای ڈی لائٹنگ سسٹم کم روشنی میں بہتر نظر آنے میں مدد دیتا ہے اور محفوظ سواری کو یقینی بناتا ہے۔
ویلیکٹرا کے مطابق ویلو سٹی 180 کی قیمت دسمبر 2025 تک 369,000 روپے مقرر کی گئی ہے، جبکہ یہ نئی رنگوں کی آپشنز اور الائے رمز کے ساتھ دستیاب ہے۔ کمپنی کی جانب سے 24 ماہ کی آسان اقساط کی سہولت بھی دی جا رہی ہے، جس کے تحت خریدار کو 139,999 روپے بطور ڈاؤن پیمنٹ ادا کرنا ہوں گے، جبکہ فنانس کی کل رقم 229,001 روپے ہوگی۔ اس منصوبے کے تحت ماہانہ قسط 9,542 روپے مقرر کی گئی ہے جو 24 ماہ تک ادا کی جائے گی۔
By 
