رابی پیرزادہ نکاح کے بندھن میں بندھ گئیں، خوبصورت تصاویر سوشل میڈیا پر وائرل

پاکستان کی سابق معروف گلوکارہ، اداکارہ اور سماجی کارکن رابی پیرزادہ نے خاموشی سے اپنی زندگی کے نئے سفر کا آغاز کرتے ہوئے ایک نجی تقریب میں نکاح کر لیا۔ اس خوشگوار موقع کی تصاویر اور ویڈیوز منظرِ عام پر آتے ہی سوشل میڈیا پر تیزی سے وائرل ہو گئیں اور مداحوں کی جانب سے مبارکباد اور نیک تمناؤں کا سلسلہ شروع ہو گیا۔

رابی پیرزادہ نے اپنے آفیشل انسٹاگرام اکاؤنٹ پر اپنی کچھ تصاویر شیئر کرتے ہوئے کیپشن میں لکھا’ نکاح سنت ہے اور سنت میں ہی برکت ہے‘۔

رابی پیرزادہ نے کہا کہ نکاح وہ پاک رشتہ ہے جو محبت کو جائز، عزت کو مضبوط اور رشتے کو ہمیشہ کے لیے مقدس بنا دیتا ہے۔ انہوں نے مزید کہا کہ اللہ ہر نکاح کو سکون، محبت اور رحمت سے بھر دے۔

رابی پیرزادہ نے نکاح کی تصاویر اپنے انسٹاگرام اکاؤنٹ پر شیئر کرتے ہوئے مداحوں اور چاہنے والوں کا شکریہ ادا کیا۔ انہوں نے لکھا کہ وہ دل کی گہرائیوں سے ان تمام دعاؤں کی شکر گزار ہیں جو انہیں موصول ہوئیں۔ ساتھ ہی انہوں نے ایک احساس کا اظہار کرتے ہوئے کہا کہ اگر یہی دعائیں قرآنِ پاک مکمل لکھنے پر ملتیں تو دل کو اور بھی زیادہ سکون حاصل ہوتا۔ ان کا کہنا تھا کہ ہمیں اپنی دعاؤں میں ہمیشہ دین کو اولین اور دنیا کو ثانوی حیثیت دینی چاہیے۔

 

View this post on Instagram

 

A post shared by Rabi Pirzada (@rabi.fairy)

شادی کی تقریب میں رابی پیرزادہ نے نہایت سادہ، باوقار اور شائستہ ملبوسات کا انتخاب کیا، جسے مداحوں نے بے حد پسند کیا اور سراہا۔ تقریب کا اہتمام سادگی کے ساتھ کیا گیا اور یہ نکاح قریبی دوستوں اور خاندان کے افراد کے درمیان نجی طور پر منعقد ہوا، جس میں محدود افراد نے شرکت کی۔

مہندی کی تقریب سے متعلق رابی پیرزادہ نے اپنے ماموں کے ساتھ تصاویر بھی شیئر کیں، جن کے ساتھ ایک جذباتی پیغام بھی تحریر کیا۔ انہوں نے لکھا کہ ماموں صرف ماں کے بھائی نہیں ہوتے بلکہ وہ ماں جیسا پیار دینے والے، دوست کی طرح سہارا بننے والے اور دل کی بات سمجھنے والے رشتے کی حیثیت رکھتے ہیں۔

اسی طرح رابی پیرزادہ نے اپنے بھائی کے ساتھ ایک خوبصورت تصویر بھی سوشل میڈیا پر پوسٹ کی، جس کے کیپشن میں انہوں نے بھائی کی اہمیت کو اجاگر کیا۔ انہوں نے لکھا کہ بھائی وہ ہوتا ہے جو دوست بھی ہو اور محافظ بھی، اور اللہ کا شکر ادا کیا کہ انہیں بھائی جیسا سچا دوست نصیب ہوا۔

یہ امر قابلِ ذکر ہے کہ رابی پیرزادہ ماضی میں شوبز انڈسٹری میں بطور گلوکارہ اور اداکارہ سرگرم رہ چکی ہیں۔ تاہم چند سال قبل انہوں نے ذاتی اور مذہبی وجوہات کی بنا پر شوبز سے کنارہ کشی اختیار کر لی تھی۔ اس کے بعد وہ مصوری، سماجی فلاحی سرگرمیوں اور فنونِ لطیفہ کے مختلف شعبوں میں فعال رہیں اور اپنی زندگی کو ایک نئے رخ پر گامزن کیا۔

یہ بھی پڑھیں: وزیرِ اعلیٰ پنجاب مریم نواز کے صاحبزادے جنید صفدر کی شادی طے پا گئی، دلہن کون ؟