راولپنڈی میں امن و امان کی صورتحال برقرار رکھنے کے لیے دفعہ 144 میں ایک بار پھر توسیع کر دی گئی ہے، ضلعی انتظامیہ کے مطابق شہر میں دفعہ 144 کا نفاذ اب 24 دسمبر تک برقرار رہے گا۔
ڈپٹی کمشنر راولپنڈی حسن وقار چیمہ کی جانب سے اس حوالے سے باضابطہ نوٹیفکیشن جاری کر دیا گیا ہے۔
نوٹیفکیشن کے مطابق راولپنڈی میں جلسے، جلوس اور ریلیوں پر مکمل پابندی عائد کر دی گئی ہے، جبکہ چار سے زائد افراد کے جمع ہونے پر بھی پابندی ہوگی۔
انتظامیہ نے واضح کیا ہے کہ دفعہ 144 کے تحت لاؤڈ اسپیکر کے استعمال پر بھی پابندی عائد رہے گی، ان اقدامات کا مقصد شہر میں امن و امان کو یقینی بنانا اور کسی بھی ناخوشگوار صورتحال سے بچاؤ ہے۔
ضلعی انتظامیہ کا کہنا ہے کہ دفعہ 144 کی خلاف ورزی کرنے والوں کے خلاف قانون کے مطابق کارروائی کی جائے گی، جبکہ شہریوں سے اپیل کی گئی ہے کہ وہ انتظامیہ سے تعاون کریں اور جاری کردہ ہدایات پر عملدرآمد کو یقینی بنائیں۔
اس سے قبل ضلعی انتظامیہ کی طرف سے وفاقی دارالحکومت میں دفعہ 144نافذ کردی گئی تھی ، انتظامیہ کی طرف سے کہا گیا ہے کسی بھی جلسے جلوس یااحتجاج کی اجازت نہیں دی جائے گی۔
By 
