بھارت کو شکست دیکر قومی انڈر 19کرکٹ ٹیم ‘ایشیا کپ’ لیکر وطن پہنچ گئی، اسلام آباد ائیرپورٹ پر شاندار استقبال

انڈر 19 ایشیا کرکٹ کے فائنل میں بھارت کو عبرتناک شکست دینے کے بعد پاکستانی شاہین ‘ایشیا کپ’ لے کر وطن واپس پہنچ گئے اور رات گئے اسلام آباد ائیر پورٹ کا انکا شاندار استقبال کیا گیا۔

تفصیلات کے مطابق اسلام آباد ائیرپورٹ پر انڈر 19 کرکٹ ٹیم کا شاندار استقبال کیا گیا جہاں شہریوں کی بڑی تعداد رات گئے کھلاڑیوں کا استقبال کرنے ائیرپورٹ پہنچی۔

فاتح کھلاڑیوں پر پتیاں نچھاور کی گئیں، پھولوں کے ہار پہنائے گئے اور گلدستے پیش کیے گئے، شہریوں نے ڈھول کی تھاپ پر رقص کیااور خوب بھنگڑے ڈالے۔

ایئرپورٹ کے باہر آتش بازی کا بھی مظاہرہ کیا گیا، کھلاڑیوں کے شاندار استقبال کے دوران فضا پاکستان زندہ باد کے نعروں سے گونج اٹھی۔ وزیراعظم شہباز شریف آج انڈر 19کرکٹ ٹیم کےکھلاڑیوں سے ملاقات کریں گے۔ ملاقات میں بھارتی ٹیم کو شکست دینے والے کھلاڑیوں کی بھرپور حوصلہ افزائی کی جائے گی۔

یاد رہے کہ پاکستان نے بھارت کو 191 رنز سے شکست دیکر ٹائٹل اپنے نام کرلیا۔: پاکستان نے مقررہ 50 اوورز میں 8 وکٹوں کے نقصان پر 347 رنز اسکور کیے اور بھارت کو جیت کے لیے 348 رنز کا ہدف دیا۔ سمیر منہاس نے 113 گیندوں پر 17 چوکے اور 9 چھکوں کی مدد سے دھواں دھار 172 رنز کی اننگز کھیلی، سمیر اس ٹورنامنٹ کے ٹاپ اسکورر ر ہے۔

مزید پڑھیں: بھارت چاروں شانے چت،غرو ر خاک میں مل گیا ،پاکستان انڈر 19ایشیائی کرکٹ کا سلطان بن گیا

348 رنز کے تعاقب میں بھارتی ٹیم 156رنز پر ڈھیر ہوگئی۔ بھارت کی جانب سے دیوندرن نے 36 اور سوریا ونشی نے 26 رنز بنائے۔

پاکستان انڈر 19 ایشیا کپ کا ٹائٹل دوسری مرتبہ جیتنے میں کامیاب ہوا ہے۔ اس سے قبل پاکستان اور بھارت 2012 کے ایونٹ میں مشترکہ طور پر فاتح رہے تھے۔