وزیراعظم شہباز شریف سے انڈر 19 ایشیا کرکٹ کپ کی فاتح ٹیم نے ملاقات کی ہے اور اس موقع پر وزیراعظم نے کھلاڑیوں کے لیے ایک، ایک کروڑ روپے انعام کا اعلان کیا۔
تفصیلات کے مطابق وزیراعظم شہباز شریف نے نوجوان کھلاڑیوں کے اعزاز میں ظہرانہ دیا اور بھارت کے خلاف شاندار کامیابی پر ٹیم اور مینیجمنٹ کو مبارکباد دی، ظہرانے میں چیئرمین پی سی بی محسن نقوی اور وفاقی وزراء نے بھی شرکت کی۔
وزیراعظم سے ملاقات کے بعد نیوز کانفرنس کرتے ہوئے ہیڈ کوچ شاہد انور نے بتایا کہ یہ پراسیس 17جون 2025سے شروع کیا جس میں 70نوجوان کھلاڑیوں کے ٹرائل ہوئے، ٹرائل کے بعد 70میں سے30کھلاڑیوں کا کیمپس لگایا گیا، ایشیا کپ میں جانے سے پہلے مقصد تھا کہ کپ اورشائقین کے دل جیتیں گے۔
پاکستان انڈر 19 کرکٹ ٹیم کے مینٹور سرفراز احمد نے ایشیا کپ کا ٹائٹل جیتنے کے بعد اعتماد کا اظہار کرتے کہا کہ ٹیم آئندہ مقابلوں میں بھی شاندار کارکردگی کا سلسلہ جاری رکھے گی۔
سرفراز احمد نے بتایا کہ وزیراعظم سے ملاقات ہوئی ہے جس میں وزیراعظم نے تمام نوجوان کھلاڑیوں کیلئے ایک ایک کروڑ روپے کا اعلان کیا ہے، تمام نوجوان کھلاڑیوں اور کوچنگ سٹاف نے بہت محنت کی تھی۔
سرفراز احمد نے بتایا کہ وزیراعظم نے پوری انڈر19ٹیم کے کھلاڑیوں کو خراج تحسین پیش کیا، امید ہے مستقبل میں یہ ٹیم مزید ٹرافیاں جیتے گی، وزیراعظم نے نوجوان کھلاڑیوں کی خوب حوصلہ افزائی کی، سمیر احمد نے بہت بہترین اننگ کھیلی، عثمان خان نے بھی سمیر احمد کے ساتھ اہم شراکت داری قائم کی۔
اس موقع پر کپتان فرحان یوسف نے کہا کہ مینجمنٹ ہمیں پوری سپورٹ کررہی ہے، ایشیا کپ جیتنے میں تمام کھلاڑیوں کا اہم کردار ہے، مینجمنٹ نے ہمیں کہا آپ اپنی کرکٹ کھیلیں ہم آپ کے ساتھ ہیں، سرفراز احمد نے کہا ہار بھی گئے تو جیت آپکی اورہار ہماری ہے۔
واضح رہے کہ قومی انڈر 19 ٹیم نے گزشتہ روز ایشیا کپ کے فائنل میں روایتی حریف بھارت کو 191 رنز کے بھاری مارجن سے شکست دی تھی۔
پاکستان کی فاتح انڈر 19 کرکٹ ٹیم اتوار اور پیر کی درمیانی شب وطن واپس پہنچ گئی، جہاں نوجوان شاہینوں کا شاندار، پُرجوش اور یادگار استقبال کیا گیا۔
خیال رہے کہ چیئرمین پاکستان کرکٹ بورڈ محسن نقوی بھی قومی انڈر 19 ٹیم کے ہر کھلاڑی کو 50 لاکھ روپے انعام دینے کا اعلان کرچکے ہیں۔
چیئرمین پی سی بی نے کھلاڑیوں کو یقین دہانی کرائی کہ ان کا ہر طرح سے خیال رکھا جائے گا، کھلاڑیوں کی میڈیکل سہولیات اور دیگر ضروریات پوری کی جائیں گی تاکہ وہ اپنی بہترین کارکردگی دکھا سکیں اور مستقبل میں بھی ملک کا نام روشن کریں۔
By 
