ہمارا ملک بتدریج مگر یقینی طور پر استحکام، وسیع تر مواقع اور عزت ووقار کی طرف بڑھ رہا ہے ، فیلڈ مارشل

چیف آف ڈیفنس فورسز و چیف آف آرمی اسٹاف فیلڈ مارشل سید عاصم منیر کی زیر صدارت 273ویں کور کمانڈرز کانفرنس منعقد ہوئی، جس میں ملکی سلامتی، اندرونی و بیرونی چیلنجز اور آپریشنل تیاریوں کا تفصیلی جائزہ لیا گیا۔

آئی ایس پی آر کے مطابق کانفرنس کے آغاز پر فورم نے مسلح افواج، قانون نافذ کرنے والے اداروں اور حالیہ دہشت گردی کے واقعات میں شہید ہونے والے معصوم شہریوں کے ایصالِ ثواب کے لیے فاتحہ خوانی کی۔ فورم نے حالیہ دہشت گردی کے واقعات میں جانوں کا نذرانہ پیش کرنے والوں اور غیر ملکی ایماء پر دہشت گردی کے فروغ کے خلاف مادرِ وطن کا دفاع کرنے والوں کو خراجِ عقیدت پیش کیا۔

ترجمان پاک فوج کے مطابق چیف آف ڈیفنس فورسز و آرمی چیف فیلڈ مارشل سید عاصم منیر نے پاکستان کی مسلح افواج کی غیر متزلزل جرات، اعلیٰ پیشہ ورانہ مہارت اور بے مثال قربانیوں کو زبردست خراجِ تحسین پیش کیا۔ انہوں نے حالیہ مہینوں کے دوران ملک بھر میں انٹیلی جنس پر مبنی انسدادِ دہشت گردی کارروائیوں میں افواجِ پاکستان کی پُرعزم اور مسلسل کوششوں کو بھی سراہا۔

آئی ایس پی آر کے مطابق اس موقع پر فیلڈ مارشل سید عاصم منیر نے کہا کہ حکومت اور پاک فوج کی مشترکہ کاوشوں اور پاکستانی عوام کی ثابت قدم حمایت کے باعث ملک بتدریج مگر یقینی طور پر استحکام، وسیع تر مواقع اور عزت و وقار کی جانب بڑھ رہا ہے۔

یہ بھی پڑھیں: پاکستان میں دہشتگردوں کی دراندازی میں طالبان حکومت بڑی سہولت کار ہے، ڈی جی آئی ایس پی آر

فورم نے اندرونی اور بیرونی سلامتی کی مجموعی صورتحال کا جامع جائزہ لیتے ہوئے ملک کو درپیش خطرات اور آپریشنل تیاریوں پر زور دیا۔ شرکاء کانفرنس نے اس عزم کا اعادہ کیا کہ بھارتی سرپرستی میں سرگرم تمام دہشت گردوں، ان کے سہولت کاروں اور معاونین کے ساتھ فیصلہ کن اور بغیر کسی رعایت کے نمٹا جائے گا۔

کانفرنس کے شرکاء نے دہشت گردی، جرائم اور سیاسی مفادات کے درمیان کسی بھی گٹھ جوڑ کو یکسر مسترد کر دیا۔ فورم نے واضح کیا کہ قومی یکجہتی، سلامتی اور استحکام کو نقصان پہنچانے کی کسی کو اجازت نہیں دی جائے گی، چاہے وہ عناصر سیاسی ہوں یا کوئی اور۔ اسی طرح مسلح افواج اور پاکستان کی عوام کے درمیان تفرقہ پیدا کرنے کی کسی بھی کوشش کو ناقابلِ قبول قرار دیا گیا۔

فورم نے بلوچستان حکومت کے خصوصی ترقیاتی اقدامات کو سراہا، جو مقامی سطح پر عوام کو بااختیار بنانے اور سماجی روابط کے ذریعے گورننس سے جڑے دہشت گردی کے عوامل کے خاتمے میں معاون ثابت ہو رہے ہیں۔ شرکاء نے پائیدار امن اور استحکام کے لیے قومی ایکشن پلان کے مطابق دیگر علاقوں میں بھی اسی طرز کے عوامی اقدامات کی ضرورت پر زور دیا۔

کانفرنس میں کشمیری عوام کے حقِ خودارادیت اور ان کی جائز جدوجہد کے لیے پاکستان کی ثابت قدم حمایت کا اعادہ کیا گیا، جبکہ مسئلہ فلسطین پر پاکستان کے اصولی مؤقف کی بھی توثیق کی گئی۔ شرکاء کانفرنس نے غزہ میں فوری اور مستقل جنگ بندی، بلا روک ٹوک انسانی رسائی اور فلسطینی ریاست کے قیام کے لیے ایک قابلِ اعتماد راستے کا مطالبہ کیا۔

یہ بھی پڑھیں: دشمن داخلی کمزوریوں سے فائدہ اٹھانے کے لیے غیر روایتی حربے استعمال کر رہا ہے، فیلڈ مارشل سید عاصم منیر

کانفرنس کے اختتام پر آرمی چیف و چیف آف ڈیفنس فورسز نے کمانڈرز کو آپریشنل تیاری، نظم و ضبط، تربیت، جسمانی فٹنس، جدید جدتوں اور میدانِ جنگ میں پیشہ ورانہ مہارت کے اعلیٰ ترین معیار کو برقرار رکھنے کی ہدایت کی۔ انہوں نے پاک فوج کی قومی خودمختاری اور علاقائی سالمیت کے مستقل تحفظ کے عزم کا اظہار کرتے ہوئے کنونشنل، سب کنونشنل، ہائبرڈ اور غیر متناسب چیلنجز سے مؤثر طور پر نمٹنے کی صلاحیت پر مکمل اعتماد کا اظہار کیا۔