عارف حبیب گروپ پی آئی اے کو کب سے چلائے گا؟ مشیر نجکاری کا اہم بیان

مشیرِ نجکاری محمد علی نے کہا ہے کہ توقع کی جا رہی ہے کہ قومی ایئر لائن کو اس کے نئے مالکان آئندہ سال اپریل سے چلانا شروع کر دیں گے۔

انہوں نے واضح کیا کہ قومی ایئر لائن کی نجکاری کا معاہدہ محض ملکیت کی منتقلی کے لیے نہیں بلکہ ادارے میں تازہ سرمایہ کاری کو یقینی بنانے کے مقصد کے تحت ترتیب دیا گیا تھا۔

غیر ملکی خبر رساں ادارے سے گفتگو کرتے ہوئے محمد علی کا کہنا تھا کہ حکومت اس بات کی خواہاں نہیں تھی کہ ایئر لائن کو فروخت کر کے ایسی صورتحال پیدا ہو جس میں کمپنی مشکلات کا شکار ہو جائے یا اس کی کارکردگی متاثر ہو۔ انہوں نے بتایا کہ نجکاری کے عمل میں اس پہلو کو خصوصی طور پر مدنظر رکھا گیا کہ قومی ایئر لائن کا تسلسل برقرار رہے اور اس کے آپریشنز مستحکم انداز میں آگے بڑھیں۔

مشیرِ نجکاری کے مطابق اس معاہدے کے نتیجے میں حکومت کو تقریباً 10 ارب روپے کی نقد رقم حاصل ہو گی، جبکہ حکومت ایئر لائن میں 25 فیصد حصص اپنے پاس برقرار رکھے گی، جن کی مجموعی مالیت 45 ارب روپے بتائی گئی ہے۔ انہوں نے کہا کہ اس انتظام کے ذریعے حکومت کا ادارے میں کردار بھی برقرار رہے گا اور ساتھ ہی نجی شعبے کی سرمایہ کاری سے ایئر لائن کو سہارا ملے گا۔

یہ بھی پڑھیں: میٹرک پاس عارف حبیب ارب پتی کیسے بنے؟

محمد علی نے ایک بار پھر اس بات کا اعادہ کیا کہ توقع ہے قومی ایئر لائن کے نئے مالکان آئندہ سال اپریل سے اس کے انتظامی اور عملی امور سنبھال لیں گے۔ ان کا کہنا تھا کہ اس منتقلی کا مقصد ایئر لائن کی مالی حالت کو بہتر بنانا اور اسے مستحکم بنیادوں پر آگے بڑھانا ہے۔

دوسری جانب عارف حبیب گروپ کے چیئرمین عارف حبیب نے کہا ہے کہ قومی ایئر لائن (پی آئی اے) کو دوبارہ عظیم بنانے کے لیے محنت کریں گے۔

انہوں نے کہا کہ آج پاکستان کی جیت ہوئی، آج کی نجکاری سے ملک میں سرمایہ کاری کو فروغ ملے گا اور بیرونِ ملک سے سرمایہ کار پاکستان میں سرمایہ کاری کریں گے۔

عارف حبیب نے کہا کہ پی آئی اے کو دوبارہ سے عظیم بنانے کے لیے محنت کریں گے، حکومت پاکستان نے بولی کا کامیاب انعقاد کرایا۔