نادرا کیجانب سے شہریوں کو ایک اور زبردست سہولت دیدی گئی

نیشنل ڈیٹا بیس اینڈ رجسٹریشن اتھارٹی (نادرا) اور پنجاب کے محکمہ صحت و بلدیات کے مابین ایک اہم اور مؤثر تعاون طے پا گیا ہے، جس کے نتیجے میں عوام کو براہِ راست اور عملی سہولت میسر آئے گی۔

 اس اشتراک کا بنیادی مقصد شہریوں کو پیدائش اور اموات کے اندراج کے پیچیدہ اور طویل کاغذی عمل سے نجات دلانا اور سرکاری ریکارڈ کو جدید تقاضوں کے مطابق زیادہ درست اور بروقت بنانا ہے۔

اس نئے نظام کے تحت پنجاب بھر کے سرکاری اسپتالوں میں ہونے والی پیدائش اور وفات کا اندراج اب فوری طور پر اور آن لائن نادرا کے ڈیٹا بیس میں کیا جا سکے گا، اس اقدام سے نہ صرف وقت کی بچت ہوگی بلکہ شہریوں کو مختلف دفاتر کے چکر لگانے کی ضرورت بھی نہیں رہے گی ،  اسپتالوں میں جمع ہونے والی معلومات براہِ راست نادرا اور متعلقہ بلدیاتی اداروں تک منتقل ہوں گی، جس سے ڈیٹا میں تاخیر اور غلطیوں کے امکانات نمایاں طور پر کم ہو جائیں گے۔

یہ بھی پڑھیں :نادرا نے شناختی کارڈ بنوانے والوں کے لئے اہم ہدایات جاری کردیں

نادرا کے ترجمان کے مطابق اس معاہدے سے مختلف سرکاری اداروں کے درمیان ڈیجیٹل رابطہ مزید مضبوط ہوگا اور ایک مربوط نظام کے ذریعے معلومات کا تبادلہ ممکن ہو سکے گا۔ اس کے نتیجے میں شہریوں کے لیے پیدائش اور وفات کے سرٹیفکیٹس کا حصول آسان، تیز اور شفاف ہو جائے گا، جو کئی دیگر سرکاری امور میں بھی مددگار ثابت ہوگا۔

اس موقع پر منعقدہ تقریب میں صوبائی وزیر صحت و آبادی خواجہ عمران نذیر نے شرکت کی اور اس شراکت کو عوامی سہولت کے حوالے سے ایک اہم سنگِ میل قرار دیا۔

ان کا کہنا تھا کہ جدید ڈیجیٹل نظام کے نفاذ سے صحت کے شعبے میں بہتر منصوبہ بندی ممکن ہوگی اور عوام کو فراہم کی جانے والی خدمات کے معیار میں بھی نمایاں بہتری آئے گی۔

یہ بھی پڑھیں :نادرا نے اوورسیز پاکستانیوں کیلئے بڑا فیصلہ کرلیا

نادرا کے اسسٹنٹ ڈائریکٹر رضوان علی نے نظامِ کار کی تفصیلات بتاتے ہوئے کہا کہ اسپتالوں سے موصول ہونے والا ڈیٹا پہلے تصدیقی مراحل سے گزرے گا، جس کے بعد اسے متعلقہ بلدیاتی اداروں کے ساتھ شیئر کیا جائے گا۔ ان کے مطابق یہ مربوط اور شفاف نظام مستقبل میں دیگر شعبوں کے لیے بھی ایک مؤثر مثال ثابت ہوگا۔