علیمہ خان کی شکایت پر تنازعہ، اہم رہنما مستعفیٰ

ایڈیشنل ایڈووکیٹ جنرل خیبرپختونخوا کے رویے پر علیمہ خان کی جانب سے ناراضی کے اظہار کے بعد پیدا ہونے والا تنازع اب انصاف لائرز فورم (آئی ایل ایف) کے اندرونی معاملات تک جا پہنچا ہے، جس کے نتیجے میں تنظیم میں شدید اختلافات سامنے آئے ہیں۔

اس صورتحال کے دوران ایڈیشنل ایڈووکیٹ جنرل اور انصاف لائرز فورم کے ضلعی صدر کے درمیان تلخ کلامی ہوئی، جس کے بعد انصاف لائرز فورم پشاور کے صدر نے احتجاجاً اپنے عہدے سے استعفیٰ دے دیا۔

تفصیلات کے مطابق یہ معاملہ اس وقت شروع ہوا جب علیمہ خان نے ایڈیشنل ایڈووکیٹ جنرل کے اڈیالہ جیل نہ پہنچنے پر ان کے خلاف شکایت کی۔ علیمہ خان کے اس اقدام کے بعد ایڈیشنل ایڈووکیٹ جنرل کے رویے پر سوالات اٹھائے گئے، جو بعد ازاں انصاف لائرز فورم کے اندرونی حلقوں میں اختلافات کی شکل اختیار کر گئے۔ یہ معاملہ وقت کے ساتھ مزید سنگین ہوتا چلا گیا اور تنظیم کے اندر کشیدگی بڑھتی گئی۔

پشاور میں یہ معاملہ اس وقت مزید شدت اختیار کر گیا جب انصاف لائرز فورم کے آفیشل گروپ میں اس پر بحث شروع ہوئی۔ گروپ میں ہونے والی گفتگو کے دوران ایڈیشنل ایڈووکیٹ جنرل اور انصاف لائرز فورم کے ضلعی صدر کے درمیان تلخ جملوں کا تبادلہ ہوا۔ ذرائع کے مطابق اس دوران ایک دوسرے کے خلاف نازیبا الفاظ کے استعمال کی اطلاعات بھی سامنے آئیں، جس سے صورتحال مزید خراب ہو گئی اور تنظیمی ماحول شدید تناؤ کا شکار ہو گیا۔

یہ بھی پڑھیں: تحریک انصاف حکومت کے سابق مشیر شہزاد اکبر کالندن میں خود پر تیزاب پھینکنے کا دعویٰ جھوٹا ثابت

تنازع کے بڑھنے پر انصاف لائرز فورم پشاور کے صدر مبشر منظور نے احتجاجاً اپنے عہدے سے استعفیٰ دینے کا اعلان کر دیا۔ مبشر منظور نے اپنے موقف میں کہا کہ ایڈیشنل ایڈووکیٹ جنرل انعام یوسفزئی کا رویہ ناقابل برداشت تھا اور ایسے حالات میں اپنی ذمہ داریاں احسن طریقے سے نبھانا ممکن نہیں رہا۔ انہوں نے واضح کیا کہ اس قسم کے رویے سے تنظیم کے وقار اور اتحاد کو نقصان پہنچتا ہے۔