سرکاری نوکری کے خواہشمند افراد کے لیے بڑی خوشخبری

آزاد جموں و کشمیر حکومت نے سرکاری نوکری کے خواہشمند افراد کے لیے ایک اہم اور خوش آئند فیصلہ کرتے ہوئے سرکاری ملازمتوں کے لیے عمر کی بالائی حد میں اضافہ کر دیا ہے۔

حکومت کے اس فیصلے کے تحت اب امیدوار 41 سال کی عمر تک سرکاری نوکری کے لیے اہل ہوں گے، جس سے بڑی تعداد میں ایسے افراد کو فائدہ پہنچنے کی توقع ہے جو عمر کی معمولی حد کے باعث پہلے نااہل قرار پاتے تھے۔

حکومتی ذرائع کے مطابق وزیراعظم آزاد جموں و کشمیر فیصل ممتاز راٹھور نے اقتدار سنبھالنے کے بعد سرکاری ملازمتوں کے لیے عمر کی حد میں ایک سال کی رعایت دینے کا اعلان کیا تھا۔ وزیراعظم کے اس اعلان کو عملی شکل دیتے ہوئے حکومت نے اس فیصلے کا باضابطہ نوٹی فکیشن جاری کر دیا ہے، جس کے بعد سرکاری نوکریوں کے لیے نئی عمر کی حد فوری طور پر نافذ العمل ہو گئی ہے۔

نوٹی فکیشن کے مطابق آزاد جموں و کشمیر میں سرکاری ملازمتوں کے لیے اب زیادہ سے زیادہ عمر کی حد 41 سال مقرر کر دی گئی ہے۔ واضح رہے کہ اس سے قبل آزاد کشمیر میں سرکاری ملازمت کے لیے عمر کی بالائی حد 40 سال تھی، جس کے باعث کئی امیدوار محض ایک سال کی کمی بیشی کی وجہ سے سرکاری ملازمت کے مواقع سے محروم رہ جاتے تھے۔

یہ بھی پڑھیں: وزارت خزانہ کا پنشن اور تنخواہوں سے متعلق اہم اعلان

حکومت کے اس فیصلے کو نوجوانوں اور سرکاری ملازمت کے خواہشمند افراد کی جانب سے خوش آئند قرار دیا جا رہا ہے۔ عمر کی حد میں اضافے سے ایسے امیدواروں کو دوبارہ مواقع میسر آئیں گے جو تعلیمی اہلیت اور دیگر شرائط پر پورا اترتے تھے مگر عمر کی حد عبور کرنے کی وجہ سے درخواست دینے کے اہل نہیں تھے۔

ذرائع کا کہنا ہے کہ عمر کی حد میں اس اضافے سے سرکاری اداروں میں تجربہ کار اور اہل افراد کی شمولیت ممکن ہو سکے گی، جبکہ سرکاری ملازمت کے لیے مقابلے کے مواقع بھی وسیع ہوں گے۔ حکومت کی جانب سے جاری کردہ نوٹی فکیشن کے بعد متعلقہ محکموں کو ہدایت کی گئی ہے کہ آئندہ بھرتیوں میں نئی عمر کی حد کو مدنظر رکھا جائے۔