وفاقی وزیر داخلہ محسن نقوی نے بیرونِ ملک سفر کرنے والے پاکستانی مسافروں کیلئے ایک اہم اور خوش آئند اقدام کا اعلان کرتے ہوئے کہا ہے کہ اب مسافر فیڈرل انویسٹی گیشن ایجنسی (ایف آئی اے) کے پری ڈیپارچر سہولت ڈیسک سے پیشگی رہنمائی اور کلیئرنس حاصل کر سکیں گے۔
اس نئی سہولت کا مقصد مسافروں کو امیگریشن اور کلیئرنس کے مراحل میں درپیش مشکلات کو کم کرنا اور ان کے سفر کو مزید آسان، محفوظ اور منظم بنانا ہے،محسن نقوی کے مطابق یہ سہولت فوری طور پر نافذ کر دی گئی ہے تاکہ مسافر اپنے سفر سے قبل ہی ضروری معلومات اور دستاویزی جانچ مکمل کر سکیں۔
اس اقدام کے ذریعے ائیرپورٹس اور بارڈر پوائنٹس پر غیر ضروری تاخیر، رش اور الجھن میں نمایاں کمی آئے گی، جس سے مجموعی طور پر سفری تجربہ بہتر ہوگا،وفاقی وزیر داخلہ نے سماجی رابطے کی ویب سائٹ ایکس (سابقہ ٹویٹر) پر جاری اپنے پیغام میں بتایا کہ پری ڈیپارچر سہولت ڈیسک ملک بھر کے تمام زونل دفاتر، بین الاقوامی ائیرپورٹس اور بارڈر پوائنٹس پر دستیاب ہوگا۔
ان کا کہنا تھا کہ اس سہولت سے نہ صرف بیرونِ ملک جانے والے مسافروں کو فائدہ پہنچے گا بلکہ ایف آئی اے کے عملے کی کارکردگی میں بھی بہتری آئے گی کیونکہ مسائل کا حل پہلے ہی مرحلے میں ممکن ہو سکے گا۔
محسن نقوی نے مزید کہا کہ مسافر اس سہولت سے فون، ای میل اور بالمشافہ تینوں طریقوں سے فائدہ اٹھا سکیں گے،اس کا مقصد یہ ہے کہ ہر مسافر اپنی سہولت اور ضرورت کے مطابق رہنمائی حاصل کر سکے، خاص طور پر وہ افراد جو پہلی مرتبہ بیرونِ ملک سفر کر رہے ہوتے ہیں اور امیگریشن کے قواعد و ضوابط سے مکمل طور پر آگاہ نہیں ہوتے۔
وزیر داخلہ کا کہنا ہے کہ پری ڈیپارچر سہولت کے ذریعے مسافر اپنے سفری دستاویزات کی پیشگی جانچ، کلیئرنس کی صورتحال، امیگریشن سے متعلق سوالات اور دیگر اہم معلومات بروقت حاصل کرسکیں گے اس سے نہ صرف وقت کی بچت ہوگی بلکہ سفری دباؤ میں بھی کمی آئے گی۔
وفاقی وزیر داخلہ نے یہ بھی بتایا کہ ایف آئی اے کی سرکاری ویب سائٹ پر اس سہولت سے متعلق مکمل اور تفصیلی معلومات فراہم کر دی گئی ہیں تاکہ مسافر اپنے سفر کی بہتر منصوبہ بندی کر سکیں۔
By 
