By شہر قائد میں سردی کی شدت میں کمی کے بعد محکمہ موسمیات نے نئی پیشگوئی جاری کر دی ہے، جس کے مطابق رواں ماہ کراچی میں سردی کی کسی نئی لہر کے آنے کا امکان نہیں ہے۔
محکمہ موسمیات کے مطابق کراچی میں کم سے کم درجہ حرارت 12 ڈگری سینٹی گریڈ ریکارڈ کیا گیا ہے۔ تاہم ہوا میں نمی کے زیادہ تناسب کے باعث شہر کے مختلف علاقوں میں دھند چھائی ہوئی ہے، جس سے حدِ نگاہ شدید متاثر ہوئی۔ گلشنِ معمار، ملیر، اسکیم 33، سرجانی ٹاؤن اور اطراف کے علاقوں میں حدِ نگاہ انتہائی کم ریکارڈ کی گئی۔
محکمہ موسمیات کا کہنا ہے کہ آئندہ تین روز کے دوران شہر کا موسم مجموعی طور پر خشک رہے گا جبکہ رات کے اوقات میں خنکی برقرار رہے گی۔ ہوا میں نمی کا تناسب زیادہ ہونے کے باعث دھند کی شدت میں اضافہ ہو رہا ہے۔
دوسری جانب ملک کے دیگر حصوں میں سردی کی شدت بدستور برقرار ہے۔ اسکردو میں درجہ حرارت منفی 11، گوپس میں منفی 9، استور اور گلگت میں منفی 8 جبکہ بگروٹ میں منفی 6 ڈگری سینٹی گریڈ ریکارڈ کیا گیا۔ قلات میں منفی 2، کوئٹہ میں منفی 1، اسلام آباد میں 1، پشاور میں 2 اور لاہور میں کم سے کم درجہ حرارت 3 ڈگری سینٹی گریڈ ریکارڈ ہوا۔
یہ بھی پڑھیں: روس: ماسکو میں برفباری نے پچھلے تمام ریکارڈ توڑ دیے، برف کے ڈھیر لگ گئے
