آسٹریلیا کی مشہور ٹی 20 لیگ بگ بیش لیگ میں پاکستان کے نامور بیٹرز بابراعظم اور محمد رضوان نے ایک ایسا ریکارڈ اپنے نام کر لیا ہے، جس نے شائقینِ کرکٹ اور ماہرین کو حیران کر دیا ہے۔ دونوں پاکستانی کھلاڑی رواں سیزن میں بگ بیش لیگ کے سست ترین بیٹرز کی فہرست میں بالترتیب پہلی اور دوسری پوزیشن پر موجود ہیں۔
تفصیلات کے مطابق بگ بیش لیگ جیسے ہارڈ ہٹنگ اور تیز رفتار فارمیٹ میں جہاں بیٹرز سے جارحانہ کھیل کی توقع کی جاتی ہے، وہاں محمد رضوان اور بابراعظم اپنی روایتی محتاط بیٹنگ کے باعث تنقید کی زد میں آ گئے ہیں۔ دونوں کھلاڑیوں سے ان کی فرنچائزز نے غیر معمولی کارکردگی کی امیدیں وابستہ کر رکھی تھیں، تاہم وہ اس معیار پر پورا اترتے دکھائی نہیں دیے۔
اعداد و شمار کے مطابق رواں سیزن میں سب سے کم سٹرائیک ریٹ کے ساتھ بیٹنگ کرنے والے بیٹرز کی فہرست میں محمد رضوان سرفہرست ہیں۔ انہوں نے 10 اننگز میں 102.74 کے سٹرائیک ریٹ سے مجموعی طور پر 187 رنز اسکور کیے، ان کی اوسط 18.7 رہی اور وہ ایک بھی نصف سنچری بنانے میں ناکام رہے۔ ٹی 20 فارمیٹ میں یہ اعداد و شمار ایک جارح مزاج اوپنر کے شایانِ شان نہیں سمجھے جا رہے۔
اس فہرست میں دوسرے نمبر پر بابراعظم موجود ہیں، جن کا سٹرائیک ریٹ 107.48 رہا۔ بابراعظم نے اب تک 9 میچز میں 28.71 کی اوسط سے 201 رنز بنائے اور 2 نصف سینچریاں بھی اسکور کیں، تاہم ان کی بیٹنگ کی رفتار ٹیم کی مجموعی حکمتِ عملی کے مطابق نہ سمجھی گئی۔ ماہرین کے مطابق بابر کی اننگز انفرادی طور پر تو مستحکم تھیں، مگر مطلوبہ تیز رفتاری کا عنصر مفقود رہا۔
سست ترین بیٹرز کی فہرست میں تیسرے نمبر پر کونسٹاس موجود ہیں، جن کا سٹرائیک ریٹ 110.21 رہا، جبکہ ٹام روجرز 127.50 کے سٹرائیک ریٹ کے ساتھ اس فہرست میں شامل ہیں، جو پاکستانی بیٹرز کے مقابلے میں کہیں بہتر تصور کیا جا رہا ہے۔
کرکٹ تجزیہ کاروں کا کہنا ہے کہ بابراعظم اور محمد رضوان اعلیٰ تکنیک اور کلاسیکل بیٹنگ کے ماہر ضرور ہیں، مگر جدید ٹی 20 کرکٹ میں محض وکٹ بچانا کافی نہیں رہا۔ بگ بیش لیگ جیسے ایونٹس میں ٹیمیں ایسے بیٹرز کی متلاشی ہوتی ہیں جو پاور پلے اور درمیانی اوورز میں تیز رفتاری سے رنز بنا سکیں۔
شائقینِ کرکٹ کی جانب سے بھی سوشل میڈیا پر ملا جلا ردِعمل سامنے آ رہا ہے، جہاں کچھ افراد دونوں کھلاڑیوں کے دفاع میں ان کے مستقل مزاج ریکارڈ کا حوالہ دے رہے ہیں، جبکہ اکثریت کا ماننا ہے کہ عالمی سطح کی لیگز میں کامیابی کے لیے اندازِ کھیل میں تبدیلی ناگزیر ہے۔
یہ دیکھنا دلچسپ ہوگا کہ آیا بابراعظم اور محمد رضوان آئندہ میچز میں اپنی حکمتِ عملی تبدیل کر کے جارحانہ بیٹنگ کا مظاہرہ کرتے ہیں یا نہیں، کیونکہ بگ بیش لیگ جیسے فارمیٹ میں وقت کے ساتھ خود کو ڈھالنا ہی کامیابی کی کنجی سمجھا جاتا ہے۔
By 
