بھارت کی سب سے بڑی ایئرلائن پر تاریخ کا سب سے بڑا جرمانہ

بھارت کی سب سے بڑی ایئرلائن کو اپنی آپریشنل ناکامیوں کے باعث تاریخ کے سب سے بڑے جرمانوں میں سے ایک کا سامنا کرنا پڑ گیا ہے۔عالمی خبر رساں اداروں کے مطابق بھارت کی فضائی ریگولیٹری اتھارٹی، ڈی جی سی اے (Directorate General of Civil Aviation) نے ایئرلائن پر 24 لاکھ 50 ہزار ڈالر کا بھاری جرمانہ عائد کیا ہے۔

ڈی جی سی اے نے جرمانے کے ساتھ ساتھ ایئرلائن کے ہیڈ آف آپریشنز کنٹرول کو عہدے سے ہٹانے کا حکم بھی جاری کیا ہے، اور ایئرلائن کی اعلیٰ انتظامیہ کو سخت وارننگ دی گئی ہے کہ وہ فوری طور پر اپنے آپریشنل نظام میں بہتری لائیں۔

یہ اقدام اس بات کی نشاندہی کرتا ہے کہ ریگولیٹری اتھارٹی اب آپریشنل سیکیورٹی اور منصوبہ بندی کی خلاف ورزیوں کو برداشت نہیں کرے گی۔
اطلاعات کے مطابق یہ جرمانہ خاص طور پر پائلٹس کے روسٹر پلاننگ اور مجموعی آپریشنل مینجمنٹ کی سنگین کوتاہیوں کی بنیاد پر عائد کیا گیا ہے۔

یہ بھی پڑھیں :ایئر انڈیا طیارے کی تباہی کا ذمہ دار مبینہ طور پر کپتان نکلا

گزشتہ چند دنوں میں ایئرلائن کی ناقص منصوبہ بندی کی وجہ سے ہزاروں پروازیں منسوخ ہوئیں، جس کے نتیجے میں دسیوں ہزار مسافر مختلف شہروں میں پھنس گئے اور شدید مشکلات کا سامنا کرنا پڑا۔

ایئرلائن انتظامیہ نے فوری طور پر ڈی جی سی اے کے احکامات پر عمل درآمد کی یقین دہانی کرائی ہے،انتظامیہ نے کہا کہ وہ روسٹر پلاننگ، عملے کی دستیابی، اور آپریشنل نظم و نسق میں بہتری کے اقدامات کریں گے ۔

انتظامیہ نے مسافروں سے بھی معذرت کی اور وعدہ کیا کہ آئندہ سروس کی پختہ منصوبہ بندی کے ذریعے مسافروں کو سہولت فراہم کی جائے گی۔
ماہرین کے مطابق یہ واقعہ بھارتی فضائی صنعت کے لیے ایک انتباہ ہے کہ ایئرلائنز کو اپنی آپریشنل قابلیت اور انتظامی ڈھانچے کو مضبوط کرنا ہوگا ورنہ ریگولیٹری جرمانے اور عہدوں کی تبدیلی جیسی کارروائیاں مزید بڑھ سکتی ہیں۔