انٹرمیڈیٹ کے طلبہ و طالبات کیلئے بڑی خبر آگئی

انٹربورڈ کراچی نے انٹرمیڈیٹ پارٹ ون (فریش) 2026 کے امتحانی فارم جمع کرانے کی تاریخ میں توسیع کر دی ہے۔

بورڈ انتظامیہ کے مطابق فارم جمع کرانے کی نئی آخری تاریخ 25 فروری 2026 مقرر کی گئی ہے، اس میں سائنس پری میڈیکل، پری انجینئرنگ، کامرس، آرٹس اور ہوم اکنامکس کے طلبہ شامل ہیں۔

بورڈ انتظامیہ نے واضح کیا ہے کہ تمام طلبہ اپنے فارم صرف آن لائن پورٹل کے ذریعے جمع کرا سکیں گے،  براہِ راست امتحانی فارم یا کسی بھی دوسرے طریقے سے فارم جمع کرانے کی صورت میں انہیں قبول نہیں کیا جائے گا۔

اس اقدام کا مقصد فارم جمع کرانے کے عمل کو شفاف اور منظم بنانا ہے تاکہ کسی بھی قسم کی غلط فہمی یا دھوکہ دہی سے بچا جا سکے۔

مزید برآں، وزیراعلیٰ سندھ کی ہدایت پر سرکاری اداروں کے طلبہ کی فیس معاف کر دی گئی ہے، طلبہ کو ہدایت دی گئی ہے کہ وہ فارم میں اپنی معلومات میٹرک مارکس شیٹ کے مطابق درج کریں،  کالجز اپنے طلبہ کے ڈیٹا، تصاویر اور دیگر دستاویزات کی تصدیق کو یقینی بنائیں۔ کسی بھی غلط تصویر یا جعلی دستاویز کی صورت میں فارم فوری طور پر منسوخ کر دیا جائے گا۔

یہ بھی پڑھیں : کیمبرج سسٹم سے منسلک سکولوں کے طلبہ کیلئے اہم خبر آگئی

بورڈ انتظامیہ نے کالجز کو ہدایت دی ہے کہ وہ اپنی تصدیق شدہ فہرست 26 فروری 2026 تک بورڈ کے اکاؤنٹس سیکشن میں جمع کرائیں، اس سے نہ صرف فارم کی تصدیق کا عمل آسان ہوگا بلکہ طلبہ کے امتحانات بروقت اور بلا رکاوٹ منعقد کیے جا سکیں گے۔

یہ توسیع طلبہ کے لیے آسانی کا سبب ہے تاکہ وہ درست معلومات کے ساتھ فارم جمع کرا سکیں اور کسی بھی پریشانی سے بچ سکیں،  تمام طلبہ اور کالجز کو ہدایت کی گئی ہے کہ وہ بورڈ کی ہدایات پر مکمل عمل کریں تاکہ فارم جمع کرانے کا عمل شفاف اور مؤثر رہے۔