پنجاب حکومت کا کسانوں سے گندم خریداری کا اعلان، قیمت تین ہزار پانچ سو روپے فی من مقرر

وزیر اعلیٰ پنجاب مریم نواز نے کہا ہے کہ پنجاب حکومت کسانوں سے گندم تین ہزار پانچ سو روپے فی من کے حساب سے خریدے گی تاکہ کاشتکاروں کو اپنی محنت کا مناسب معاوضہ مل سکے اور زرعی شعبے کو مضبوط بنایا جا سکے۔

سماجی رابطے کی ویب سائٹ ’’ایکس‘‘ پر جاری اپنے بیان میں وزیر اعلیٰ پنجاب نے واضح کیا کہ سٹریٹجک گندم ذخائر کے حوالے سے پنجاب ملک کا پہلا صوبہ ہے جس نے اس شعبے میں جدید اور منظم پالیسی متعارف کرائی ہے۔

پنجاب پہلا صوبہ ہے جس نے اپنے strategic wheat reserves کیلئے پہلی پبلک پرائیویٹ پارٹنرشپ پر مشتمل ایک پالیسی دی۔ جس کے تحت اس سال پنجاب کے کسانوں سے تیس لاکھ میٹرک ٹن گندم 3500 روپے فی من کے حساب سے خریدی جائیگی ۔۔ مجھے یہ بتا کر خوشی ہو رہی ہے کہ الحمدُللّٰہ آج 35 ڈومیسٹک اور…

— Maryam Nawaz Sharif (@MaryamNSharif) February 23, 2026

انہوں نےکہا  کہ پنجاب حکومت نے پہلی مرتبہ عوامی و نجی شراکت داری پر مشتمل گندم خریداری کی پالیسی پیش کی ہے جس کا مقصد زرعی نظام کو بہتر بنانا اور کسانوں کو براہ راست فائدہ پہنچانا ہے۔

یہ بھی پڑھیں :گندم کی قیمت سے متعلق اہم خبر

  اس نئی پالیسی کے تحت پنجاب بھر کے کسانوں سے مجموعی طور پر تیس لاکھ میٹرک ٹن گندم خریدی جائے گی۔ حکومت کی جانب سے گندم کی خریداری کی قیمت تین ہزار پانچ سو روپے فی من مقرر کی گئی ہے،حکام کا کہنا ہے کہ اس اقدام سے کسانوں کو اپنی فصل کی بہتر قیمت مل سکے گی اور انہیں مارکیٹ میں قیمتوں کے اتار چڑھاؤ سے بھی تحفظ حاصل ہوگا۔

وزیر اعلیٰ پنجاب نے کہا کہ صوبائی حکومت کا مقصد زرعی شعبے کو جدید خطوط پر استوار کرنا اور کسانوں کو سہولیات فراہم کرنا ہے۔ انہوں نے مزید کہا کہ گندم خریداری کے عمل کو شفاف اور منظم بنانے کے لیے خصوصی انتظامات کیے جائیں گے تاکہ کسان بغیر کسی مشکل کے اپنی فصل حکومت کو فروخت کر سکیں۔

حکومت کی اس پالیسی کا بنیادی مقصد زرعی پیداوار میں اضافہ، کسانوں کی معاشی بہتری اور گندم کے ذخائر کو منظم انداز میں محفوظ کرنا ہے۔ پنجاب حکومت کا کہنا ہے کہ مستقبل میں بھی کسان دوست اقدامات کو ترجیح دی جائے گی تاکہ زراعت کے شعبے کو ترقی دی جا سکے اور کاشتکاروں کی فلاح و بہبود کو یقینی بنایا جا سکے۔