اسلام آباد میں بغیر ایم ٹیگ موٹر سائیکل چلانے پر پابندی؛ 28 فروری آخری تاریخ، یکم مارچ سے کریک ڈاؤن کا فیصلہ

وفاقی دارالحکومت کو محفوظ بنانے اور جرائم کی بیخ کنی کے لیے ایکسائز اینڈ ٹیکسیشن ڈیپارٹمنٹ نے موٹر سائیکل ایم ٹیگ (M-Tag) مہم کے دوسرے مرحلے کا باقاعدہ آغاز کر دیا ہے۔

ڈائریکٹر جنرل ایکسائز عرفان میمن نے دو ٹوک الفاظ میں واضح کیا ہے کہ مقررہ تاریخ کے بعد قانون کی خلاف ورزی کرنے والوں کے خلاف سخت ایکشن لیا جائے گا۔

تمام موٹر سائیکل سواروں کے لیے ایم ٹیگ لگوانے کی آخری تاریخ 28 فروری مقرر کی گئی ہے۔ یکم مارچ سے بغیر ایم ٹیگ کسی بھی موٹر سائیکل کو سڑک پر آنے کی اجازت نہیں ہوگی۔ خلاف ورزی کرنے والی موٹر سائیکل کو فوری طور پر ضبط کر کے متعلقہ تھانے منتقل کر دیا جائے گا۔

ڈی جی ایکسائز کے مطابق، اس اقدام کا بنیادی مقصد اسلام آباد میں سیکیورٹی کو فول پروف بنانا اور موٹر سائیکلوں کے ذریعے ہونے والے جرائم کی روک تھام کرنا ہے۔ ایکسائز ڈیپارٹمنٹ نے شہریوں کی سہولت اور رجسٹریشن کے عمل کو تیز کرنے کے لیے درج ذیل اقدامات کیے ہیں:

مزید پڑھیں: اسلام آباد کے شہریوں کے لیئے خوشخبری، ایم ٹیگ لگوانے کے لیئے بڑے ریلیف کا اعلان

ایم ٹیگ سینٹرز پر رش سے بچنے کے لیے مزید اہلکار تعینات کر دیے گئے ہیں۔ شہریوں کی آسانی کے لیے ہفتہ وار چھٹی کے روز بھی مراکز کھلے رہیں گے تاکہ ملازمت پیشہ افراد اپنی رجسٹریشن مکمل کر سکیں۔

اب تک مہم کے دوسرے مرحلے میں 2 ہزار سے زائد موٹر سائیکلوں کو کامیابی سے ایم ٹیگ جاری کیے جا چکے ہیں۔ ڈی جی ایکسائز نے جڑواں شہروں کے شہریوں سے اپیل کی ہے کہ “شہری ذمہ داری کا ثبوت دیں اور آخری تاریخ کا انتظار کیے بغیر اپنی موٹر سائیکلوں پر ایم ٹیگ لگوائیں تاکہ شہر کو محفوظ بنایا جا سکے۔ یہ اقدام آپ کی اور آپ کے خاندان کی حفاظت کے لیے ہے۔”

ایم ٹیگ لگوانے کی آخری تاریخ 28 فروری ہے اوریکم مارچ سے بغیر ایم ٹیگ موٹر سائیکل تھانے بند کر دی جائے گی۔ ایکسائز دفاتر چھٹی کے دن بھی کھلے ہیں۔ آج ہی اپنی رجسٹریشن مکمل کریں اور قانونی کارروائی سے بچیں!