By وفاقی پولیس نے بیرونِ ملک مقیم پاکستانیوں کے لیے اہم ڈیجیٹل سہولت متعارف کراتے ہوئے “گلوبل پی کے ایم” ایپلیکیشن لانچ کر دی ہے، جس کے ذریعے کیریکٹر سرٹیفکیٹ کے حصول، پاسپورٹ کی تجدید اور مختلف سرکاری دستاویزات کی آن لائن تصدیق ممکن ہو سکے گی۔ حکام کے مطابق اس اقدام کا مقصد اوورسیز پاکستانیوں کو پاکستان آئے بغیر سرکاری خدمات کی فراہمی یقینی بنانا ہے۔
تقریبِ رونمائی سے خطاب کرتے ہوئے ہارون جوئیہ، ڈی جی سیف سٹی اسلام آباد، نے کہا کہ نئی ایپلیکیشن کے ذریعے وہ تمام سہولیات فراہم کی جا رہی ہیں جو پاکستان میں قائم خدمت مراکز میں دستیاب ہوتی ہیں۔ ان کے مطابق “پی کے ایم” ایپ کا اجرا ڈیجیٹل گورننس کے فروغ کی جانب ایک اہم سنگِ میل ہے اور اس سے اوورسیز پاکستانیوں کو نمایاں سہولت ملے گی۔
یہ بھی پڑھیں:رمضان ریلیف پیکج،12500روپے لینے والوں کیلئے بڑی شرط ختم،اب پیسے کیسے ملیں گئے۔تفصیلات جانیے
حکام کا کہنا ہے کہ اس ایپ کے ذریعے پولیس کیریکٹر سرٹیفکیٹ کا اجرا اور ایمپلائر ویریفکیشن کا عمل بھی آن لائن مکمل کیا جا سکے گا، جس سے بیرون ملک ملازمت یا امیگریشن کے لیے درکار دستاویزات کی تصدیق کا عمل تیز اور شفاف ہو جائے گا۔ ایپ کو 40 سے زائد ممالک میں قائم پاکستانی سفارتخانوں اور قونصل خانوں کے ساتھ منسلک کیا گیا ہے تاکہ درخواست دہندگان کو بروقت سہولت فراہم کی جا سکے۔
اسلام آباد سیف سٹی اتھارٹی کے مطابق اس اقدام سے نہ صرف وقت اور اخراجات کی بچت ہوگی بلکہ جعلسازی اور غیر قانونی ویریفکیشن کے امکانات بھی کم ہوں گے۔ حکام نے بتایا کہ بیرون ملک مقیم پاکستانی اب ملازمین کی ویریفکیشن سمیت متعدد سروسز موبائل ایپ کے ذریعے حاصل کر سکیں گے۔
سرکاری حلقوں کا کہنا ہے کہ حکومت ڈیجیٹل پاکستان وژن کے تحت مزید سرکاری خدمات کو آن لائن منتقل کرنے پر کام کر رہی ہے تاکہ شہریوں کو جدید، شفاف اور آسان سہولیات فراہم کی جا سکیں، خصوصاً ان پاکستانیوں کو جو بیرون ملک مقیم ہیں اور اکثر دستاویزی امور کے لیے مشکلات کا سامنا کرتے ہیں۔
