لکی مروت میں سیکورٹی فورسز کا انٹیلی جنس بیسڈ آپریشن، 5خوارج ہلاک

   پاکستان کی سیکیورٹی فورسز نے لکی مروت ضلع میں خفیہ معلومات کی بنیاد پر ایک آپریشن کیا، جس میں 5خوارج کو ہلاک کردیا گیا، آپریشن کا مقصد علاقے میں سرگرم خوارج کے عناصر کو بے اثر کرنا اور ان کے دہشت گردانہ نیٹ ورک کو ختم کرنا تھا۔

سیکیورٹی ذرائع کے مطابق آپریشن کے دوران پاکستانی فورسز نے خوارج کے ٹھکانے کو مؤثر طریقے سے نشانہ بنایا اور شدید فائرنگ کے تبادلے کے بعد5 خوارج ہلاک کر دیے گئے۔ ہلاک شدہ عناصر بھارتی حمایت یافتہ تھے اور علاقے میں متعدد دہشت گردانہ سرگرمیوں میں ملوث پائے گئے تھے۔

آپریشن کے دوران ہلاک ہونے والے خوارج سے بڑی مقدار میں ہتھیار اور گولہ بارود بھی برآمد کیا گیا۔ حکام کے مطابق یہ دہشت گرد علاقے میں دہشت گردانہ کارروائیاں کرنے اور سکیورٹی فورسز کے خلاف حملے کرنے کے لیے سرگرم تھے۔

یہ بھی پڑھیں :خیبرپختونخوا میں فتنہ الخوارج کے خلاف بڑا آپریشن، 5 علاقوں میں کارروائی، 13 دہشتگرد ہلاک

سیکیورٹی فورسز کے مطابق علاقے میں آپریشن بھی جاری ہے تاکہ دیگر بھارتی سرپرستی یافتہ خوارج کو بھی پکڑا جا سکے۔ اس سلسلے میں جاری کارروائی وفاقی سطح کی قومی ایکشن پلان کی منظوری یافتہ مہم “عزمِ استحکام” کے تحت کی جا رہی ہے، جس کا مقصد ملک میں غیر ملکی سرپرستی یافتہ اور حمایت یافتہ دہشت گردی کے عناصر کا مکمل خاتمہ ہے۔

حکام نے کہا کہ پاکستان کی سیکیورٹی فورسز اور قانون نافذ کرنے والے ادارے دہشت گردی کے خاتمے کے لیے ہر ممکن اقدامات کر رہے ہیں اور ملک کے اندر دہشت گردانہ نیٹ ورک کو تباہ کرنے کے لیے کارروائیاں مسلسل جاری رہیں گی۔