By وفاقی دارالحکومت اسلام آباد میں شہریوں کی تفریح کے لیے مشہور ہائیکنگ ٹریلز کو اچانک بند کرنے کا فیصلہ کر لیا گیا ہے جس کے بعد ضلعی انتظامیہ نے باضابطہ نوٹیفکیشن جاری کر دیا
نوٹیفکیشن کے مطابق ان مقامات پر ہر قسم کی عوامی سرگرمیوں پر پابندی عائد کر دی ہے۔ یہ اقدام فوری طور پر نافذ العمل ہوگا اور اگلے احکامات تک جاری رہے گا۔
اعلامیے کے مطابق بند کیے جانے والے ٹریلز میں ٹریل 2، ٹریل 3، ٹریل 4، ٹریل 5 اور سیدپور گاؤں کے عقب میں واقع ٹریل شامل ہیں جہاں شہریوں کا داخلہ مکمل طور پر روک دیا گیا ہے۔
انتظامیہ کا کہنا ہے کہ یہ فیصلہ عوامی مفاد اور انتظامی وجوہات کی بنیاد پر کیا گیا ہے تاہم اس کی تفصیلات فراہم نہیں کی گئیں۔
نوٹیفکیشن میں واضح کیا گیا ہے کہ ان ہائیکنگ ٹریلز پر ہر قسم کی سرگرمی، بشمول سیر و تفریح اور ورزش، مکمل طور پر ممنوع ہوگی۔
یہ بھی پڑھیں :مون سون بارشوں کے باعث مارگلہ ہلز کی ٹریلز عارضی طور پر بند
اس سلسلے میں متعلقہ اداروں کو سختی سے عملدرآمد یقینی بنانے کی ہدایات بھی جاری کر دی گئی ہیں تاکہ کسی بھی خلاف ورزی کو روکا جا سکے۔
ضلعی انتظامیہ نے اس فیصلے پر عملدرآمد کے لیے چیف کمشنر آفس، اسلام آباد پولیس، کیپیٹل ڈیولپمنٹ اتھارٹی (سی ڈی اے)، وزارت داخلہ اور پیمرا سمیت دیگر اداروں کو متحرک کر دیا ہے۔
سکیورٹی اداروں کو ہائی الرٹ رہنے اور ان علاقوں میں نگرانی بڑھانے کی ہدایت دی گئی ہے تاکہ صورتحال مکمل طور پر کنٹرول میں رہے۔
یہ بھی پڑھیں :سپریم کورٹ نے مارگلہ ہلز میں تعمیرات کو غیر قانونی قرار دے دیا
حکام نے شہریوں سے اپیل کی ہے کہ وہ جاری کردہ احکامات کی مکمل پابندی کریں اور بندش کے دوران ان مقامات کا رخ کرنے سے گریز کریں۔
انتظامیہ کے مطابق یہ اقدامات شہریوں کی حفاظت اور نظم و ضبط برقرار رکھنے کے لیے کیے گئے ہیں، جبکہ صورتحال کا مسلسل جائزہ لے کر آئندہ لائحہ عمل کا فیصلہ کیا جائے گا۔
