پنجاب میں نوجوانوں کو روزگار کے بہتر مواقع فراہم کرنے اور جدید ٹیکنالوجی کے میدان میں مہارت دلانے کے لیے وزیراعلیٰ پنجاب آئی ٹی انٹرن شپ پروگرام کے دوسرے مرحلے کی رجسٹریشن کا باقاعدہ آغاز کر دیا گیا ہے۔
اس پروگرام کے تحت منتخب امیدواروں کو ماہانہ 50000 روپے وظیفہ دینے کے ساتھ ساتھ ملک کی نمایاں معلوماتی ٹیکنالوجی کمپنیوں میں عملی کام کا موقع بھی فراہم کیا جائے گا۔
نجی ٹی وی کے مطابق پنجاب انفارمیشن ٹیکنالوجی بورڈ نے دوسرے بیچ کے لیے درخواستوں کی وصولی شروع کر دی ہے، اس پروگرام کا بنیادی مقصد معلوماتی ٹیکنالوجی کے شعبے سے وابستہ فارغ التحصیل نوجوانوں کو عملی میدان میں داخل کرنا اور انہیں ڈیجیٹل معیشت کا مؤثر حصہ بنانا ہے، اس اقدام کے ذریعے حکومت نوجوانوں کو جدید تقاضوں سے ہم آہنگ کرنے کی کوشش کر رہی ہے۔
پروگرام کے تحت کامیاب امیدواروں کو پانچ ماہ تک معروف معلوماتی ٹیکنالوجی اداروں میں کام کرنے کا موقع دیا جائے گا، جہاں وہ نہ صرف جدید مہارتیں حاصل کریں گے بلکہ اپنے پیشہ ورانہ تجربے کو بھی مضبوط بنا سکیں گے اس دوران انہیں عملی منصوبوں پر کام کرنے کا موقع ملے گا جس سے ان کا اعتماد اور قابلیت دونوں میں اضافہ ہوگا۔
اہلیت کے معیار کے مطابق درخواست گزار نے گزشتہ چار برس کے دوران معلوماتی ٹیکنالوجی، کمپیوٹر سائنس یا کسی متعلقہ شعبے میں ڈگری مکمل کی ہو،اس کے علاوہ امیدوار کے پاس پنجاب کا ڈومیسائل اور کارآمد قومی شناختی کارڈ ہونا لازمی قرار دیا گیا ہے،ماہانہ وظیفے کی ادائیگی امیدوار کی کارکردگی اور اعلیٰ تعلیمی کمیشن سے تصدیق شدہ ڈگری کی بنیاد پر کی جائے گی۔
چیئرمین فیصل یوسف کا کہنا ہے کہ یہ پروگرام نوجوانوں اور صنعت کے درمیان ایک مضبوط رابطہ ثابت ہوگا، جس سے نوجوانوں کو عملی تجربہ حاصل کرنے کا موقع ملے گا اس اقدام سے نہ صرف بے روزگاری میں کمی آئے گی بلکہ صوبے کی ڈیجیٹل معیشت کو بھی نمایاں فروغ حاصل ہوگا۔
By 
