سوات ایکسپریس وے پر وین اور بس میں تصادم کے باعث 16 افراد جان کی بازی ہار گئے جبکہ کئی زخمی ہیں۔
تفصیلات کے مطابق حادثہ اسماعلیہ کے قریب مسافر وین اور بس کے درمیان پیش آیا ہے ، حادثے کا شکار بس کراچی سے بونیر اور وین راولپنڈی سے دیرجارہی تھی۔
ریسکیو حکام کےمطابق مسافر بس سڑک کنارےکھڑی تھی کہ پیچھے سےآنے والی وین تیز رفتاری کے باعث اس سے جا ٹکرائی، ابتدائی اطلاعات کے مطابق حادثہ وین ڈرائیور کی مبینہ غفلت کے باعث پیش آیا۔
حادثے کی اطلاع ملتے ہی ریسکیو ٹیموں نے موقع پر پہنچ کر لاشوں اور زخمیوں کو قریبی اسپتال منتقل کیا، جہاں زخمیوں کو طبی امداد دی جا رہی ہے۔
حادثے کے بعد ترجمان موٹروے پولیس نے ابتدائی طور پر 11 مسافروں کے جاں بحق اور 7 کے زخمی ہونے کی تصدیق کی تھی، تاہم تازہ ترین اپڈیٹ کے مطابق اموات کی تعداد 16 تک پہنچ گئی ہے جبکہ 6 زخمی ہسپتال میں زیر علاج ہیں۔
این ایچ اے کے مطابق ڈی آئی جی موٹروے خود ہسپتال میں موجود ہیں اور امدادی کاموں کی نگرانی کر رہے ہیں۔
موٹروے پولیس کا کہنا ہے کہ واقعے کے حوالے سے مزید قانونی کارروائی جاری ہے۔
By 
