تہلکا خیز: ملک کی تاریخ میں پہلی دفعہ نیب نے پاکستان سے باہر ملک ریاض کے اکاؤنٹس منجمد کروا دیے

پاکستان میں منی لانڈرنگ اور غیر قانونی اثاثوں کی بیرونِ ملک منتقلی کے خلاف جاری کارروائیوں کے سلسلے میں قومی احتساب بیورو (نیب) کراچی نے ماریشس میں موجود 2 غیر ملکی بینک اکاؤنٹس منجمد کر دیے ہیں، جوملک ریاض کی ملکیت والی بحریہ ٹاؤن انتظامیہ سے منسلک ہیں۔

نیب کی جانب سے جاری اعلامیے کے مطابق یہ اکاؤنٹس ملزمان احمد علی ریاض اور مبشرہ علی ملک کے نام پر سلور بینک، ماریشس میں موجود ہیں۔ یہ کارروائی انسدادِ منی لانڈرنگ ایکٹ 2010 کے تحت احتساب عدالت کراچی سے باقاعدہ اجازت حاصل کرنے کے بعد عمل میں لائی گئی۔

یہ بھی پڑھیں:نیب کا بحریہ ٹاؤن کے خلاف بڑا ایکشن، بحریہ ٹاؤن کراچی اور بحریہ ٹاؤن 2 کی ہزاروں ایکڑ زمین منجمد

جاری اعلامیے کے مطابق تحقیقات کے دوران نیب نے مؤقف اختیار کیا کہ میسرز بحریہ ٹاؤن پرائیویٹ لمیٹڈ نے پاکستان میں مبینہ طور پر غیر قانونی حوالہ ہنڈی نیٹ ورک استعمال کرتے ہوئے جرائم سے حاصل شدہ رقوم بیرونِ ملک منتقل کیں۔

نیب کے مطابق یہ رقوم پہلے متحدہ عرب امارات منتقل کی گئیں اور بعد ازاں ماریشس پہنچائی گئیں، جہاں انہیں مشترکہ بینک اکاؤنٹس میں جمع کیا گیا۔

نیب حکام کا کہنا ہے کہ ان اکاؤنٹس میں اس وقت تقریباً 45 لاکھ امریکی ڈالر موجود ہیں، جنہیں قانونی طور پر منجمد کر دیا گیا ہے۔ یہ اقدام بیرونِ ملک منتقل کیے گئے مبینہ غیر قانونی اثاثوں کی بازیابی کی کوششوں کا حصہ ہے۔

مزید پڑھیں:حکومت کا بحریہ ٹاؤن کی مری میں 527 کنال اراضی نیلام کرنے کا فیصلہ

نیب نے مزید بتایا کہ ان رقوم کی ضبطی اور پاکستان واپسی کے لیے وزارتِ خارجہ اور متعلقہ بین الاقوامی اداروں کے ذریعے قانونی کارروائی جاری ہے، جو انسدادِ منی لانڈرنگ ایکٹ 2010 کے تحت آخری مراحل میں داخل ہو چکی ہے۔

اعلامیے کے مطابق ادارے نے اس کارروائی کو بین الاقوامی مالیاتی جرائم کے خلاف مہم میں ایک اہم پیش رفت قرار دیتے ہوئے کہا کہ نیب غیر قانونی اثاثوں کی دنیا بھر میں کھوج اور ان کی واپسی کے لیے عالمی تعاون کے تحت اپنی کوششیں جاری رکھے گا۔