پی ٹی اے نے اوورسیز پاکستانیوں کو بڑی خوشخبر ی سنا دی

بیرونِ ملک مقیم پاکستانیوں اور غیر ملکی شہریوں کے لیے پاکستان ٹیلی کمیونیکیشن اتھارٹی (پی ٹی اے) نے ایک اہم اور سہولت بخش اقدام متعارف کرایا ہے جس کے تحت وہ پاکستان آمد پر اپنا ذاتی موبائل فون 120 روز تک مقامی موبائل نیٹ ورکس پر بغیر کسی اضافی ٹیکس یا مستقل رجسٹریشن کے استعمال کر سکیں گے۔

اقدام کا مقصد مختصر مدت کے لیے پاکستان آنے والے مسافروں، اوورسیز پاکستانیوں اور غیر ملکی شہریوں کو مواصلاتی سہولت فراہم کرنا ہے تاکہ انہیں اپنے قیام کے دوران موبائل فون کے استعمال میں کسی قسم کی دشواری کا سامنا نہ کرنا پڑے۔

پی ٹی اے کے مطابق اس سہولت کے تحت درخواست گزار اپنے ایک موبائل فون کی عارضی رجسٹریشن کرا سکتا ہے جس کے بعد وہ پاکستان میں 120 دن تک مقامی سم استعمال کرتے ہوئے فون چلا سکے گا۔ یہ مدت پاکستان میں آمد کی تاریخ سے شمار کی جائے گی اور ہر نئے دورے پر دوبارہ درخواست دینا لازمی ہوگا۔

 یہ بھی پڑھیں :اب پیسے نہیں کٹیں گے ، پی ٹی اے نے نیا سسٹم متعارف کروا دیا

اتھارٹی کا کہنا ہے کہ عارضی رجسٹریشن کے لیے چند بنیادی معلومات فراہم کرنا ضروری ہیں جن میں پاسپورٹ نمبر، قومی شناختی دستاویز، اپنے نام پر رجسٹرڈ پاکستانی موبائل نمبر، موبائل فون کا شناختی نمبر، برقی ڈاک کا پتہ اور پاکستان آمد و روانگی کی متوقع تاریخ شامل ہیں۔ درخواست کی منظوری کے لیے یہ بھی لازمی قرار دیا گیا ہے کہ استعمال ہونے والی پاکستانی سم درخواست گزار کے اپنے نام پر رجسٹرڈ ہو۔

پی ٹی اے نے واضح کیا ہے کہ وہ افراد جو اپنی بیرونِ ملک سم کے ذریعے رومنگ سروس استعمال کر رہے ہوں، انہیں اس عارضی رجسٹریشن کی ضرورت نہیں ہوگی۔ اسی طرح اگر موبائل فون دو سموں کی سہولت رکھتا ہے تو دونوں شناختی نمبرز فراہم کرنا لازمی ہوگا تاکہ رجسٹریشن مکمل ہو سکے۔

 یہ بھی پڑھیں :پاکستان میں آئی فون 17 سیریز کی قیمتیں اور پی ٹی اے ٹیکسز سامنے آ گئے

پی ٹی اے کے مطابق سہولت صرف ایک موبائل فون تک محدود ہوگی اور اسے تجارتی مقاصد، فروخت یا کسی دوسرے فرد کے نام پر دوبارہ رجسٹر کرانے کے لیے استعمال نہیں کیا جا سکے گا۔ اگر کوئی شخص 120 دن سے زائد عرصے تک پاکستان میں قیام کرنا چاہے یا مستقل بنیادوں پر فون استعمال کرنے کا ارادہ رکھتا ہو تو اسے باقاعدہ رجسٹریشن کرانا ہوگی اور متعلقہ سرکاری محصولات بھی ادا کرنا ہوں گی۔