وائی فائی صرف انٹرنیٹ نہیں، اب بجلی بھی فراہم کر سکتا ہے، نئی تحقیق

سنگاپور کی نیشنل یونیورسٹی آف سنگاپور کے محققین نے ایک ایسی نئی ٹیکنالوجی تیار کی ہے جو فضا میں موجود وائی فائی اور موبائل نیٹ ورک کے ریڈیو سگنلز سے توانائی حاصل کرکے اسے بجلی میں تبدیل کر سکتی ہے۔

محققین کے مطابق اس ٹیکنالوجی میں انتہائی چھوٹے اسپن ریکٹیفائرز  استعمال کیے گئے ہیں، جو بہت کم طاقت والے ریڈیو فریکوئنسی سگنلز کو بھی قابلِ استعمال برقی توانائی میں تبدیل کرنے کی صلاحیت رکھتے ہیں۔

یہ بھی پڑھیں :دنیا کا مہنگا ترین خط، قیمت 14 ارب 20 کروڑ روپےسے بھی زیادہ

تحقیق کے دوران سائنس دانوں نے اس ٹیکنالوجی کی مدد سے کمرے میں موجود وائی فائی سگنلز سے حاصل ہونے والی توانائی کے ذریعے چھوٹے الیکٹرانک آلات، جیسے سینسرز اور ڈیجیٹل تھرمامیٹر، کامیابی سے چلائے۔

ماہرین کا کہنا ہے کہ اس نظام کی توانائی کو بجلی میں تبدیل کرنے کی کارکردگی تقریباً 7.8 فیصد تک پہنچ چکی ہے، جبکہ آئندہ مرحلے میں اسے مائیکرو چپس میں ضم کرنے پر کام جاری ہے۔

یہ بھی پڑھیں :یوٹیوب شارٹس میں زبردست اپ ڈیٹ، اب تصاویر سے بھی پوسٹس بنانا ممکن

محققین کے مطابق اس ٹیکنالوجی کا بنیادی مقصد کم توانائی استعمال کرنے والے سمارٹ آلات، جیسے آئی او ٹی سینسرز اور دیگر چھوٹے الیکٹرانک ڈیوائسز، کو روایتی بیٹریوں پر کم انحصار کے ساتھ چلانا ہے۔ اس سے الیکٹرانک فضلے اور توانائی کے استعمال میں بھی کمی لانے میں مدد مل سکتی ہے۔

تاہم ماہرین واضح کرتے ہیں کہ موجودہ مرحلے پر یہ ٹیکنالوجی اسمارٹ فونز یا لیپ ٹاپ جیسے زیادہ بجلی استعمال کرنے والے آلات کو صرف وائی فائی سگنلز سے چارج کرنے کے قابل نہیں ہے۔ اس لیے یہ کہنا درست نہیں ہوگا کہ مستقبل قریب میں موبائل فون کے چارجر یا بیٹریاں مکمل طور پر ختم ہو جائیں گی۔

سائنس دانوں کا کہنا ہے کہ اگر اس شعبے میں مزید پیش رفت ہوئی تو آنے والے برسوں میں بیٹری سے چلنے والے کم توانائی والے آلات کے لیے یہ ٹیکنالوجی ایک مؤثر متبادل ثابت ہو سکتی ہے۔