By 9 مئی کیسز میں مبینہ طور پر ملوث معروف فیشن ڈیزائنر اور پی ٹی آئی رہنما خدیجہ شاہ پر سفری پابندیوں کے خاتمے کیلئے امریکا نےپاکستانی حکام سے رابطہ کر لیا۔
تفصیلات کے مطابق امریکی سفارتخانے نے تحریک انصاف کی رہنما خدیجہ شاہ کے مقدمے میں پاکستانی حکام سے رابطوں کی تصدیق بھی کر دی ہے ۔امریکی سفارتخانے کا کہنا ہے کہ واشنگٹن کے لیے اس کے شہریوں کی سکیورٹی اورتحفظ سب سے اہم ہے، امریکی سفارت خانے کا کہنا ہے کہ شروع سے ہم نے اس بات پر زور دیا ہے کہ خدیجہ شاہ کےخلاف ہونے والا ہنگامہ آرائی کا مقدمہ پاکستان کے قانون کے مطابق چلنا چاہیے ۔ اس میں ہماری کوئی دو سری رائےقطعاً نہیں تھی ۔
امریکی سفارت خانے کا مزید کہنا ہے کہ خدیجہ شاہ تک 5بار قونصلر رسائی حاصل کرچکے ہیں جبکہ واضح کیا ہے کہ مقدمے کی نگرانی جاری رکھی جا ئیگی۔یاد رہے کہ امریکی نژاد پاکستانی شہری خدیجہ شاہ نے 9 مئی 2023 کے ہنگامہ آرائی ، جلاؤ گھیراؤ ، توڑ پھوڑ کے الزامات میں23 مئی 2023 کو اپنے آپ کو لاہور پولیس کے سپرد کردیا تھا، تحریک انصاف کی خاتون رہنما خدیجہ نشاہ نے کئی ماہ تک جیل میں قید کی سزا کاٹی اور مقدمے کی سماعت کیلئے عدالت میں بھی حاضر ہوتی رہیں ، دسمبر 2023 میں کوئٹہ کی انسداد دہشت گردی نے انہیں ضمانت پر رہا کردیا تھا۔
پولیس نے دعویٰ کیا تھاکہ 9 مئی کو کور کمانڈر ہاؤس لاہور پر ہونے والے حملوں کیلئے اکسانے والے افراد میں خدیجہ شاہ سرفہرست تھیں اور انہیں دہشت گردی ودیگر الزامات کے تحت سرور روڈ پولیس میں درج ایف آئی آر میں نامزد کیا گیا تھا۔ واضح رہے کہ 9 مئی کے مظاہروں کے نتیجے میں ملک بھر میں پی ٹی آئی کے ہزاروں کارکنوں اور حامیوں کی گرفتاریاں ہوئی تھیں، جبکہ کئی رہنماؤں نے پارٹی سے الگ ہونے کا فیصلہ کر لیا تھا ۔ واضح رہے کہ پی ٹی آئی کے کئی کارکن ابھی تک ملک کی مختلف جیلوں میں قیدو بند کی صعوبتیں برداشت کر رہے ہیں ۔
