By گورنر خیبر پختونخوا فیصل کریم کنڈی کا کہنا ہے کہ علی امین گنڈا پور سرکاری ملازمین سے 26فیصد تنخواہ میں اضافہ کرنے کاوعدہ پورا کریں ۔
تفصیلات کے مطابق اسلام آباد میں میڈیا سے گفتگو کرتے ہوئے فیصل کریم کنڈی نے کہا کہ ہم جمہوری لوگ ہیں سیاسی یتیموں کو سیاسی شہید نہیں بننے دیں گے ۔ حالیہ بجٹ پر مختلف سیاسی پارٹیوں کی اپنی اپنی رائے تھی۔ان کا صحافی کے ایک سوال کے جواب میں کہنا تھا کہ کہ امن وامان قائم کرنا صوبائی حکومت کی ذمہ داری ہے، خیبر پختونخوا کے جنوبی اضلاع دہشت گردی کی لپیٹ میں ہیں۔ گورنر کے پی کے نے کہا کہ دہشت گر دی کے معاملے پر ایپکس کمیٹی کا اجلاس بلا کر کے بریفنگ لی جائے اور وزیراعلیٰ لاء اینڈ آرڈر پر ان کیمرہ اجلاس میں اپنے ممبران کواعتماد میں لیں۔
ان کا مزید کہنا تھا کہ وزیراعلیٰ کے اپنے ضلع میں امن وامان کی صور ت حال ٹھیک نہیں ہے ان کے ضلع میں شام کے بعد لوگ گھرون سے باہر نہیں نکل سکتے ۔ وزیراعلیٰ علی امین گنڈا پور ٹریک سوٹ کے بجائے کھیلوں کے میدان آباد کریں، چیئرمین پاکستان کرکٹ بورڈ ( پی سی بی ) سے خیبر پختونخوا میں کرکٹ گراؤنڈ بنانے کا کہوں گا۔ ان کا کہنا تھا کہ کے پی نے 26 یونیورسٹیز کے وائس چانسلرز کی تعینانی سے متعلق کوئی سمری نہیں بھیجی، صوبے کا تعلیمی معیار تباہ ہوچکا ہے۔
تعلیمی اصلاحات کے لیے ایک ٹاسک فورس بنائیں گے اور صوبے کے حقوق کے لیے جرگہ سسٹم بناؤں گا۔ ان کا کہنا تھا کہ ساری سیاسی پارٹیاں شامل کر کے وفاق سے اپنے حقوق گیس ، پانی اور بجلی لوں گا۔ وزیراعظم شہباز شریف سے ملاقات میں خیبرپختو نخوا کے پراجیکٹ کی درخواست کی ہے ، وفاقی کابینہ نے چشمہ لفٹ کنال کے لئے پیسے مختص کئے ہیں ۔ امید ہے رواں سال چشمہ لفٹ کنال کا سنگ بنیاد رکھیں گے اور چشمہ پراجیکٹ کے پمنگ بڑھا کر زیادہ زمین کو سیراب کیا جا سکے گا۔
