By اسلام آباد ہائیکورٹ کے جسٹس میاں گل حسن اورنگزیب نے پاکستان تحریک انصاف کی اسلام آباد میں جلسے کا مقام تبدیل کرنے کی درخواست پر سماعت کی جس میں اسلام آباد انتظامیہ نے اسلام آباد ہائی کورٹ کو ترنول پر جلسے کی یقین دہانی کروائی یے۔
اسلام آباد ہائی کورٹ میں تحریک انصاف کے اسلام آباد جلسے کے حوالےسے سماعت میں درخواست گزار وکیل شعیب شاہین نے موقف اختیار کیا کہ ہمیں پچھلے 6 ماہ سے جلسے کی اجازت نہیں دی جارہی۔ عدالت نے استفسار کیا کہ ابھی انہوں نے آپ کو کہاں جلسے کی اجازت دی ہے؟ شعیب شاہین نے بتایا کہ انہوں نے جہاں اجازت دی ہے وہاں پانچ ہزار لوگ بھی نہیں آسکتے۔ ہمیں ایف 9 پارک، پریڈ گراؤنڈ یا پشاور موڑ پر جگہ دے دیں۔ جسٹس میاں گل حسن اورنگزیب نے ریمارکس دیئے ایف 9 پارک کا سوال ہی پیدا نہیں ہوتا، ایک تو پارک رہ گیا ہے، پارکس کا کیا قصور ؟
یہ بھی پڑھیں: وفاقی کابینہ نے آئیندہ پانچ سال کے لیے 24 اداروں کی نجکاری کا فیصلہ کر لیا
ایڈووکیٹ جنرل نے انتظامیہ کی جانب سے 22 اگست کو ترنول کے مقام پر جلسے کی اجازت دینے کی یقین دہانی کروائی ہے۔ وکیل شعیب شاہین کے جلسے کا مقام تبدیل کرنے پر زور دینے پر عدالت نے ریمارکس دیئے شعیب صاحب عدالت جلسے کے مقام سے متعلق آڈر پاس نہیں کرسکتی، یہ انتظامیہ کا کام ہے، آپ اپنی تقریر تیار کریں۔ عدالت نے انتظامیہ کی جانب سے ترنول کے مقام پر جلسے کی اجازت دینے کی یقین دہانی کے بعد پی ٹی آئی کی درخواست نمٹا دی۔
