معین علی کا بین الاقوامی کرکٹ سے ریٹائرمنٹ کا اعلان

انگلینڈ سے کھیلنے پر ہمیشہ فخر رہا ہے،آل راؤنڈر معین علی نے بین الاقوامی کرکٹ سے ریٹائرمنٹ کا اعلان کر دیا ۔

تفصیلات کے مطابق معین علی ٹیسٹ کرکٹ سے پہلے ہی ریٹائرمنٹ لے چکے ہیں اور اب انہوں نے ہر قسم کی بین الاقوامی کرکٹ سے دوررہنے کا فیصلہ کر لیا ۔ معین علی کو آسٹریلیا کے خلاف وائٹ بال سیریز کے لیے زیر غور نہیں لایا گیا۔

برطانوی جریدے سے خصوصی گفتگو میں معین علی نے انٹرنیشنل کرکٹ سے ریٹائرمنٹ کا اعلان کیا۔ انہوں نے کہا ہے کہ میں 37 سال کا ہو چکا ہوں، آسٹریلیا کے خلاف سیریز کے لیے منتخب نہیں کیا گیا، میں نے انگلینڈ کے لیے بہت کرکٹ کھیل لی ہے، اب یہ وقت نئی نسل کا ہے۔

معین علی کا کہنا ہے کہ میں نے محسوس کیا کہ یہ مناسب وقت ہے، میں نے اپنا حصہ پورا کر دیا ہے، اگرچہ میں ریٹائر ہو رہا ہوں، میں یہ محسوس نہیں کرتا کہ میں بہت زیادہ اچھا نہیں ہوں۔

یہ بھی پڑھیں:چیمپئنز ٹرافی کیلئے بھارت سمیت تمام ٹیمیں پاکستان آئیں گی: چیئرمین پی سی بی

انگلش کرکٹر نے کہا کہ میں اب بھی کھیل سکتا ہوں لیکن میں سمجھتا ہوں ٹیم نے ایک اور سرکل میں آگے بڑھنا ہے، مجھے انگلینڈ کی جانب سے کھیلنے پر ہمیشہ فخر رہا ہے۔ واضح رہے کہ معین علی نے 68 ٹیسٹ، 138 ون ڈے اور 92 ٹی ٹوئنٹی میچز میں انگلینڈ کی نمائندگی کی۔