By کراچی: شہر قائد کے رہائشیوں کے لیے ایک خوشخبری ہے کہ اب وہ گھر بیٹھے آن لائن آسانی سے لرننگ اور انٹرنیشنل ڈرائیونگ لائسنس حاصل کر سکتے ہیں۔
تفصیلات کے مطابق، کلفٹن ڈرائیونگ لائسنس برانچ میں شہریوں کے لیے آن لائن سروسز کی افتتاحی تقریب منعقد ہوئی، جس میں وزیر داخلہ سندھ، ضیاالحسن لنجار، مہمان خصوصی کے طور پر شریک ہوئے۔
آن لائن سروسز کے ذریعے شہری باآسانی لرننگ اور انٹرنیشنل ڈرائیونگ لائسنس کی سہولت حاصل کر سکیں گے۔ جلد ہی نان کمرشل لائسنس کی تجدید کی سہولت بھی مہیا کی جائے گی۔
تقریب سے خطاب کرتے ہوئے وزیر داخلہ سندھ نے آئی جی سندھ اور ڈی آئی جی ڈی ایل کو آن لائن سروسز کے آغاز پر مبارکباد دی۔ انہوں نے کہا کہ یہ اقدام ایک سنگ میل ثابت ہوگا اور جدید پولیسنگ سے سندھ پولیس کا چہرہ مزید بہتر ہوگا۔
وزیر نے اس بات کا بھی ذکر کیا کہ ڈرائیونگ لائسنس کے حصول میں مشکلات کا سامنا کرنا پڑتا ہے۔ ان کا کہنا تھا کہ شہریوں کو بہتر خدمات فراہم کرنے کی کوشش کی گئی ہے تاکہ ان کی مشکلات کو کم کیا جا سکے۔
وزیر داخلہ نے سندھ پولیس کے بہتر تشخص کی اہمیت پر زور دیا اور کہا کہ آئی جی سندھ اور ان کی ٹیم نے آج ایک اہم کامیابی حاصل کی ہے۔ انہوں نے پارکنگ کے نظام کو بہتر بنانے کی ہدایات بھی جاری کیں۔
وزیر نے کراچی پولیس چیف کو ہدایت دی کہ ساؤتھ اور سٹی ڈسٹرکٹس میں ماڈل تھانے بنائے جائیں اور ان کے عملے کے لیے خصوصی پیکیجز فراہم کیے جائیں۔
آئی جی سندھ، غلام نبی میمن، نے کہا کہ ہم شہریوں کے لیے آن لائن سہولیات فراہم کر رہے ہیں، تاکہ ڈرائیونگ لائسنس کے اجرا کی سہولت کے ذریعے ٹریفک حادثات کو کم کیا جا سکے۔ انہوں نے کہا کہ یہ خدمات شہریوں کے لیے زیادہ آسانی پیدا کریں گی اور ڈرائیونگ لائسنس برانچ پر دباؤ بھی کم کریں گی۔
آئی جی سندھ نے وزیر داخلہ سے کہا کہ آپ کی حمایت ہی ہماری سفارشات کی منظوری کا باعث بنتی ہے، اور انہوں نے تھانہ کلچر کی تبدیلی پر زور دیتے ہوئے کہا کہ ہم شہریوں کو ڈرائیونگ لائسنس کے اجرا میں مزید آسانی فراہم کرنے کے لیے کوشاں ہیں۔
