حکومت پنجاب نے صوبے بھر کے تعلیمی اداروں میں کل، یعنی 18 اکتوبر کو چھٹی دینے کا فیصلہ کیا ہے۔ اس فیصلے کے تحت تمام نجی اور سرکاری سکول، کالج اور یونیورسٹیاں بند رہیں گی۔
یہ فیصلہ قانون نافذ کرنے والے اداروں کی سفارش پر امن و امان کی صورتحال کے پیش نظر کیا گیا ہے۔ حکومت نے طلباء و طالبات کی حفاظت کو اپنی اولین ترجیح قرار دیا ہے، اور دفعہ 144 کے تناظر میں احتجاج اور ہنگامے کے خدشات کو مدنظر رکھا گیا ہے۔
محکمہ داخلہ کی سفارش پر محکمہ سکول ایجوکیشن اور محکمہ ہائر ایجوکیشن نے اس حوالے سے نوٹیفکیشن جاری کر دیا ہے۔ حکومت نے واضح کیا ہے کہ کسی بھی قسم کا احتجاج یا سرکاری و نجی تنصیبات پر حملے برداشت نہیں کیے جائیں گے۔
دوسری جانب حکومت پنجاب نے صوبہ بھر میں دفعہ 144 نافذ کر دی ہے۔ محکمہ داخلہ پنجاب کے جاری کردہ نوٹیفیکیشن کے مطابق صوبے میں 2 دن کیلئے دفعہ 144 نافذ کی گئی۔ پابندی کا اطلاق جمعہ 18 اکتوبر سے ہفتہ 19 اکتوبر تک ہو گا۔
اس دوران پنجاب بھر میں ہر قسم کے احتجاج، جلوس اور ایسی تمام سرگرمیوں پر پابندی عائد کی گئی ہے۔ دفعہ 144 کے نفاذ کا فیصلہ امن و امان کے قیام، انسانی جانوں اور املاک کے تحفظ کیلئے کیا گیا۔
سکیورٹی خطرات کے پیش نظر کوئی بھی عوامی جلوس دہشت گردوں کیلئے سافٹ ٹارگٹ ہو سکتا ہے۔ محکمہ داخلہ پنجاب نے دفعہ 144 کے نفاذ کا نوٹیفکیشن جاری کر دیا ہے۔
By 
